DAMU nga syudad ha Kanaan an nag-aandam yana ha pakig-away ha Israel. Naghuhunahuna hira nga magdadaog hira. Kondi diri sugad hito an panhunahuna han mga tawo ha kahirani nga syudad han Gibeon. Natoo hira nga binubuligan han Dios an mga Israelita, ngan diri nira karuyag nga makig-away ha Dios. Salit maaram ka ba kon ano an ginbuhat han mga Gibeonitanhon?

Naghimo hira hin paagi basi tumoo an mga Israelita nga baga hin naukoy hira ha hirayo gud nga lugar. Salit an iba ha ira nagsul-ot hin daan na gud nga mga bado ngan mga sandalyas. Ginkargahan nira an ira mga asno hin daan na gud nga mga sako, ngan nagdara hin bahaw na nga mga tinapay. Ngan kinadto hira kan Josue ngan nagsiring: ‘Tikang kami ha hirayo hinduro nga lugar, tungod kay hinbatian namon an ginbuhat han iyo makagarahum nga Dios nga hi Jehova. Hinbatian namon an ngatanan nga iya ginbuhat para ha iyo ha Ehipto. Salit ginsugo kami han amon mga lider nga mag-andam hin pagkaon para ha pagbyahe nganhi ngan sidngon ha iyo: “Mga surugoon niyo kami. Pagsaad kamo nga diri kamo makikig-away ha amon.” Nakikita niyo nga daan na gud an amon mga bado tungod han amon hirayo nga byahe ngan nabahaw na an amon mga tinapay.’

Tinoo ha mga Gibeonitanhon hi Josue ngan an iba nga lider. Salit nagsaad an mga Israelita nga diri makikig-away ha ira. Kondi paglabay hin tulo ka adlaw hinbaroan nira nga an mga Gibeonitanhon naukoy la ngay-an ha hirani.

‘Kay ano nga nagsiring kamo ha amon nga tikang kamo ha hirayo nga lugar?’ nagpakiana hi Josue ha ira.

An mga Gibeonitanhon binaton: ‘Ginbuhat namon ito tungod kay ginsumatan kami nga nagsaad an iyo Dios nga hi Jehova nga ihahatag ha iyo ini nga bug-os nga tuna han Kanaan. Salit nahadlok kami nga bangin pamatayon niyo kami.’ Kondi gintuman han mga Israelita an ira saad, ngan waray nira pamataya an mga Gibeonitanhon. Ira lugod ginhimo hira nga mga surugoon.

Nasina an hadi han Jerusalem tungod kay an mga Gibeonitanhon nakigmurayaw ha Israel. Salit nagsiring hiya ha iba nga upat nga hadi: ‘Kadi kamo, ngan buligi ako ha pakig-away ha Gibeon.’ Ngan ito an ginbuhat han lima nga hadi. Maaramon ba an mga Gibeonitanhon ha pakigmurayaw ha Israel, nga tungod hito nakig-away ha ira an lima nga hadi? Aton kitaon.