KARUYAG ni Moises nga umupod ha mga Israelita ngadto ha Kanaan. Salit naghangyo hiya: ‘Jehova, pataboka ako ha Salog Jordan, ngan pakitaa ako han maopay nga tuna.’ Kondi hi Jehova nagsiring: ‘Husto na! Ayaw na pag-unabi hini!’ Maaram ka ba kon kay ano nga ginsiring ini ni Jehova?

Tungod ini han nahitabo han ginbalbag ni Moises an bato. Hinumdumi nga waray pasidunggi nira Moises ngan Aaron hi Jehova. Waray nira sumati an katawohan nga hi Jehova an nagpabugwak han tubig tikang ha bato. Salit, nagsiring hi Jehova nga diri hira makakasulod ha Kanaan.

Paglabay hin pipira ka bulan katapos mamatay hi Aaron, ginsidngan ni Jehova hi Moises: ‘Kuhaa hi Josue, ngan patindoga hiya ha atubangan ni Eleasar nga saserdote ngan ha katawohan. Ngan ha atubangan nira ngatanan, sumati hira nga hi Josue na an bag-o nga lider.’ Ginbuhat gud ni Moises an ginsiring ni Jehova, sugad han imo nakikita ha retrato.

Katapos, hi Jehova nagsiring kan Josue: ‘Magmakusog ka ngan ayaw kahadlok. Ikaw an mangunguna ha mga Israelita ha pagsulod ha Kanaan nga akon iginsaad ha ira, ngan maupod ako ha imo.’

Ngan hi Jehova nagsiring kan Moises nga sumagka ha Bukid Nebo ha tuna han Moab. Didto ha bawbaw, makikita ni Moises an tabok han Salog Jordan ngan an makaruruyag nga tuna han Kanaan. Hi Jehova nagsiring: ‘Ini an tuna nga akon iginsaad nga ihahatag ha mga anak nira Abraham, Isaak, ngan Jakob. Akon iginpapakita ini ha imo, kondi diri ko ikaw pasusudlon dinhi.’

Didto ha Bukid Nebo namatay hi Moises ha edad nga 120. Makusog pa hiya ngan maopay pa an iya pagkita. Nasubo gud ngan nanangis an katawohan tungod kay patay na hi Moises. Kondi malipayon hira nga hi Josue an ira bag-o nga lider.