NAKABATI ka na ba hin asno nga nagyayakan? ‘Waray pa,’ bangin sumiring ka. ‘Diri nagyayakan an mga hayop.’ Kondi ha Biblia may-ada istorya mahitungod han asno nga nagyakan. Aton kitaon kon paonan-o ito nahitabo.

Hirani na sumulod an mga Israelita ha Kanaan. An hadi han Moab nga hi Balak, nahahadlok ha ira. Salit iginpatawag niya an maaramon nga tawo nga hi Balaam basi panhimarauton an mga Israelita. Nagsaad hi Balak nga tatagan hi Balaam hin damu nga kwarta, salit sinakay hi Balaam ha iya asno ngan nagpakadto kan Balak.

Diri karuyag ni Jehova nga panhimarauton ni Balaam an Iya katawohan. Salit nagsugo Hiya hin anghel nga may-ada hilaba nga espada nga tumindog ha dalan basi pugngan hi Balaam. Diri niya nakikita an anghel, kondi nakikita ito han iya asno. Salit nangalimbasog paglikay an asno ha anghel, ngan linuob na la ito ha dalan. Nasina gud hi Balaam, ngan iya ginlatob an asno hin kahoy.

Katapos, iginpabati ni Jehova kan Balaam an pagyakan ha iya han asno. ‘Ano an akon nabuhat ha imo nga imo man ako ginlalatob?’ nagpakiana an asno.

‘Tungod kay imo ako gintitinuyawan,’ siring ni Balaam. ‘Kon may-ada la ako espada, ginpatay ko na ikaw!’

‘Gintinuyawan ko na ba ikaw hadto?’ nagpakiana an asno.

‘Waray,’ binaton hi Balaam.

Katapos, iginpakita ni Jehova kan Balaam an anghel nga may-ada espada nga natindog ha dalan. An anghel nagsiring: ‘Kay ano nga ginlilinatob mo an imo asno? Kinanhi ako basi pugngan ka tungod kay diri mo sadang panhimarauton an Israel. Kon an imo asno waray maglikay ha akon, ginpatay ko na unta ikaw, kondi diri ko papatayon an imo asno.’

Hi Balaam nagsiring: ‘Nakasala ako. Diri ako maaram nga aada ka ha dalan.’ Ginpalakat han anghel hi Balaam, ngan kinadto hi Balaam kan Balak. Karuyag pa gihapon ni Balaam nga panhimarauton an Israel, kondi, ginpahinabo lugod ni Jehova nga bendisyonan ni Balaam an Israel hin tulo ka beses.