KITAA! Natabok an mga Israelita ha Salog Jordan! Kondi hain an tubig? Tungod kay mauran hito nga panahon han tuig, kanina la hilarom an salog. Kondi yana, waray na tubig! Ngan an mga Israelita natabok ha mamara nga tuna sugad han ira pagtabok ha Dagat nga Pula! Nahingain an tubig? Aton kitaon.

Han inabot an panahon han pagtabok han mga Israelita ha Salog Jordan, ini an iginpapasumat ni Jehova kan Josue ha katawohan: ‘An mga saserdote kinahanglan magpas-an han arka han kauyonan ngan mag-uuna ha iyo. Kon tumunob hira ha tubig han Salog Jordan, maundang an pag-awas hito.’

Salit ginpas-an han mga saserdote an arka han kauyonan, ngan nag-una hira ha katawohan. Pag-abot nira ha Jordan, tinunob dayon hira ha tubig. Masulog ngan hilarom gud ito. Kondi pagtunob nira ha tubig, inundang ito ha pag-awas! Milagro ito! Ginpugngan ni Jehova an tubig ha iraya. Salit, hinubas dayon an salog!

Nakikita mo ba dinhi ha retrato an mga saserdote? Ginpapas-an nira an arka han kauyonan ngan diniretso hira ha butnga han hinubas nga salog. Samtang natindog hira didto, an ngatanan nga Israelita tinabok ha mamara nga bahin han Salog Jordan!

Han nakatabok na an ngatanan, ginsugo ni Jehova hi Josue nga sidngan an 12 nga magkusog nga kalalakin-an: ‘Kadto ha salog nga tinitindogan han mga saserdote nga nagpapas-an han arka han kauyonan. Kuha hin 12 nga bato, ngan ibutang ito ha lugar nga iyo kakaturogan yana nga gab-i. Ha tidaraon, kon magpakiana an iyo mga anak kon ano ini nga mga bato, susumatan niyo hira nga inundang an tubig ha pag-awas han igintabok ha Jordan an arka han kauyonan ni Jehova. Ito nga mga bato magpapahinumdom ha iyo hini nga milagro!’ Nagbutang liwat hi Josue hin 12 nga bato ha lugar nga tinitindogan han mga saserdote ha butnga han salog.

Katapos, ginsidngan ni Josue an mga saserdote nga nagpapas-an han arka han kauyonan: ‘Sagka na kamo tikang ha Jordan.’ Ngan han pakasagka nira, inawas na liwat an salog.