KITAA an iginlulubong hini nga tawo ha iya tolda! Usa nga maopay nga bado, bareta nga bulawan, ngan pipira nga salapi. Ginkuha niya ito ha syudad han Jeriko. Kondi ano unta an sadang buhaton ha mga butang ha Jeriko? Nahinunumdoman mo ba?

Sadang ito sunugon, ngan an bulawan ngan salapi sadang ibutang ha burutangan han bahandi ha tolda ni Jehova. Salit waray magsunod ha Dios ini nga mga tawo. Ginkawat nira an mga butang nga para ha Dios. Ini nga tawo amo hi Akan, ngan kapamilya niya ini nga iya mga kaupod. Aton kitaon kon ano an nahitabo.

Katapos kawaton ni Akan ini nga mga butang, nagsugo hi Josue hin mga sundalo basi makig-away ha syudad han Ai. Kondi napirde hira ha pakig-away. Namatay an iba, ngan nakapalagiw an iba. Nabido gud hi Josue. Hinapa hiya ha tuna ngan nag-ampo kan Jehova: ‘Kay ano nga gintugotan mo nga mahitabo ini ha amon?’

Hi Jehova binaton: ‘Buhat! Nakasala an Israel. Ginkuha nira an pipira nga butang nga sadang sunugon o ibutang ha akon tabernakulo. Ginkawat nira an maopay nga bado ngan igintago ito. Diri ko kamo bibendisyonan kon diri niyo sunugon ito, ngan an nagkuha hito nga mga butang.’ Nagsiring hi Jehova nga iya isusumat kan Josue kon hin-o ito nga maraot nga tawo.

Salit gintirok ni Josue an ngatanan nga katawohan, ngan igintutdo ni Jehova an maraot nga hi Akan. Nagsiring hi Akan: ‘Nakasala ako. Nakakita ako hin maopay nga bado, bareta nga bulawan, ngan pipira nga salapi. Naruyagan ko gud ito salit ginkuha ko ito. Iginlubong ko ito ha sulod han akon tolda.’

Han hin-agian ito nga mga butang ngan gindara kan Josue, hiya nagsiring kan Akan: ‘Kay ano nga ginsamok mo kami? Yana sasamukon ka ni Jehova!’ Dida hito ginbato hi Akan ngan an iya pamilya tubtob nga namatay. Ipinapakita hito nga diri gud naton sadang kuhaon an mga butang nga gintatag-iya han iba, diri ba?

Katapos, nakig-away utro an Israel ha Ai. Hini nga panahon, ginbuligan ni Jehova an iya katawohan ngan nagdaog hira.