MAARAM ka ba kon ano ini nga tinukod? Espesyal nga tolda ini para ha pagsingba kan Jehova. Tinatawag liwat ini nga tabernakulo. Natapos an pagtukod hini han mga Israelita paglabay hin usa ka tuig tikang nga ginawas hira ha Ehipto. Maaram ka ba kon hin-o an nagpatukod hini? Hi Jehova.

Han nakadto hi Moises ha Bukid Sinai, ginsumatan hiya ni Jehova kon paonan-o tutukuron ito. Siring Niya nga himoon ito ha disenyo nga masayon pagburublagon. Hito nga paagi, an mga bahin hito masayon dad-on ha iba nga lugar, ngan tukuron utro didto. Salit, kon nagbuburobalhin an mga Israelita ha kamingawan, dara-dara nira ito nga tolda.

Kon kitaon mo an sulod han gutiay nga kwarto ha durho han tolda, makikita mo an usa nga kahon. Tinatawag ito nga arka han kauyonan. May-ada ito duha nga anghel o kerubin nga bulawan nga magkaatbang. Iginsurat utro han Dios an Napulo nga Sugo ha duha nga papan nga bato tungod kay iginpusdak ni Moises an siyahan. Ngan iginsulod ini ha arka han kauyonan. Iginsulod liwat didto an usa nga tibod nga may-ada manna. Nahinunumdoman mo ba kon ano an manna?

Hi Aaron nga bugto ni Moises an ginpili ni Jehova nga magin hitaas nga saserdote. Hiya an nanguna ha katawohan ha pagsingba kan Jehova. Ngan mga saserdote liwat an iya mga anak.

Yana, kitaa an durodaku nga kwarto han tolda. Doble an kadaku hito kay ha gutiay nga kwarto. Nakikita mo ba an kahon nga may nagawas nga aso? Ini an halaran diin ginsusunog han mga saserdote an mahamot nga insenso. May-ada liwat kandelero nga pito an lampara. Ngan an ikatulo nga butang hito nga kwarto, usa nga lamesa nga may-ada 12 nga tinapay.

Ha gawas han tabernakulo may-ada daku nga planggana nga puno hin tubig. Ginagamit ito han mga saserdote ha paghunaw ngan paghimsaw. May-ada liwat daku nga halaran nga ginsusunogan han mga hayop nga iginhahalad kan Jehova. An tabernakulo nahimumutang ha butnga han kampo, ngan an mga Israelita naukoy ha ira mga tolda ha palibot hito.