KITAA hi Josue. Nasiring hiya: ‘Adlaw, ayaw katunod!’ Ngan an adlaw waray matunod ha magkulop. Ginpahinabo ito ni Jehova! Kondi aton kitaon kon kay ano nga karuyag ni Josue nga magpadayon nga nasirak an adlaw.

Han an lima nga magraot nga mga hadi ha Kanaan nagtikang makig-away ha mga Gibeonitanhon, hira nagsugo hin usa ka tawo ngadto kan Josue basi mangaro hin bulig. ‘Kadia kami dayon!’ siring niya. ‘Talwasa kami! An ngatanan nga hadi ha bungturon nga tuna nagkaabot ha pakig-away ha amon nga iyo mga surugoon.’

Kinadto dayon hi Josue ngan an ngatanan nga iya kasundalohan. Nagmartsa hira ha bug-os nga gab-i. Pag-abot nira ha Gibeon, nahadlok an kasundalohan han lima nga hadi ngan nanmalagiw. Katapos, nagpauran hi Jehova hin dagku nga graniso ngan mas damu nga kasundalohan an nagkamatay tungod ha kaigo han mga graniso kay ha ginpamatay han kasundalohan ni Josue.

Nakita ni Josue nga hirani na matunod an adlaw. Magsisirom na ngan damu an makakapalagiw nga kasundalohan han lima nga magraot nga hadi. Salit nag-ampo hiya kan Jehova ngan nagsiring: ‘Adlaw, ayaw katunod!’ Han waray matunod an adlaw ngan padayon nga nasirak, natapos han mga Israelita an pakig-away ngan nagdaog hira.

Damu pa an magraot nga hadi ha Kanaan nga nasisina ha katawohan han Dios. Inabot hin unom ka tuig antes mapirde ni Josue ngan han iya kasundalohan an ngatanan nga 31 nga hadi hito nga tuna. Katapos, ginsiguro ni Josue nga mabahin-bahin an tuna han Kanaan ha mga tribo nga waray pa teritoryo.

Paglabay hin damu ka tuig, namatay hi Josue ha edad nga 110. Han buhi pa hiya ngan an iya kasangkayan, an katawohan nasugot kan Jehova. Kondi han nagkamatay na hira, hinay-hinay nga nagbuhat hin maraot an mga tawo salit nagkaproblema hira. Hito nga panahon, kinahanglan gud nira an bulig han Dios.