Diin nagtikang an langit ngan an tuna? Paonan-o iniksister an adlaw, bulan, mga bitoon, ngan an damu nga butang ha tuna? Mababasa naton ha Biblia an husto nga baton—ginlarang ito han Dios. Salit ini nga aton libro nagtitikang ha mga istorya ha Biblia mahitungod han paglarang.

Hibabaroan naton nga siyahan nga ginlarang han Dios an espiritu nga mga persona nga puropariho ha iya. Mga anghel hira. Ginlarang an tuna para ha mga tawo sugad ha aton. Salit, ginlarang han Dios an lalaki ngan babaye nga hira Adan ngan Eva ngan ginpaukoy hira ha makaruruyag nga hardin. Kondi waray nira sunda an Dios salit nawara nira an regalo nga kinabuhi nga waray kataposan.

Ha kabug-osan, 1,656 ka tuig an peryodo tikang han paglarang kan Adan tubtob han daku nga Baha. Durante hini nga panahon, damu an magraot nga persona. Ha langit, amo hi Satanas ngan an iya magraot nga anghel, an diri-nakikita nga espiritu nga mga persona. Ha tuna, amo hi Kain ngan iba pa nga magraot nga tawo, upod na an diri-ordinaryo nga magkusog nga tawo. Kondi may-ada liwat hadto mag-opay nga tawo ha tuna—hira Abel, Enok ngan Noe. Ha Bahin UNO mababasa naton an mga panhitabo ngan istorya mahitungod ha ira.