AN NGATANAN nga mag-opay nga butang nagtikang ha Dios. Ginlarang niya an adlaw basi maghatag ha aton hin lamrag kon adlaw, ngan an bulan ngan mga bitoon basi magkaada lamrag kon gab-i. Ngan ginlarang niya an tuna basi ukyan naton.

Kondi diri an adlaw, bulan, mga bitoon ngan tuna an siyahan nga ginlarang han Dios. Maaram ka ba kon ano? An siyahan nga ginlarang han Dios amo an mga persona nga pariho ha iya. Diri naton hira nakikita, sugad la nga diri naton nakikita an Dios. Ha Biblia, tinatawag hira nga mga anghel. Ginlarang hira han Dios basi magin kaupod niya ha langit.

An siyahan nga anghel nga ginlarang han Dios espesyal gud. Hiya an suhag nga Anak han Dios, ngan kaupod hiya han iya Amay ha paglarang. Kabulig hiya han Dios ha paglarang han ngatanan nga butang—upod na an adlaw, bulan, mga bitoon ngan an aton tuna.

Ano an hitsura han tuna hadto? Ha tinikangan, waray puydi mabuhi ha tuna. An ngatanan natatabonan han katubigan. Kondi karuyag han Dios nga ukyan naton nga mga tawo an tuna. Salit igin-andam niya ito para ha aton. Ano an iya ginbuhat?

Siyahan, nagkikinahanglan hin lamrag an tuna. Salit ginpaabot han Dios ha tuna an lamrag tikang ha adlaw. Ginbuhat niya ito basi magkaada gab-i ngan adlaw. Katapos, ginpahinabo han Dios nga umutwal an tuna ha bawbaw han katubigan.

Ha tinikangan waray bisan ano ha tuna. Pariho ito han imo nakikita dinhi ha retrato. Waray mga bukad, kahoy, o hayop, ngan bisan mga isda ha kadagatan. Damu pa an kinahanglan buhaton han Dios basi an tuna magin maopay gud pag-ukyan han mga hayop ngan tawo.