HI Noe may-ada asawa ngan tulo nga anak nga amo hira Sem, Ham ngan Japet. Ngan an tagsa ha ira may-ada asawa. Salit walo ka tawo an membro han pamilya ni Noe.

May-ada naiiba nga iginpabuhat an Dios kan Noe. Ginsugo hiya nga maghimo hin daku nga arka. Pariho hin barko an kadaku hito, kondi mas pariho ito hin daku ngan hilaba nga kahon. An Dios nagsiring: ‘Himoa ito nga tulo ka andana nga may-ada mga kwarto.’ Ito nga mga kwarto para kan Noe ngan ha iya pamilya, ha mga hayop, ngan ha pagkaon nira ngatanan.

Nagsiring liwat an Dios kan Noe nga bulihon an arka basi diri makasulod an tubig. An Dios nagsiring: ‘Magpapahinabo ako hin daku nga baha ngan bubungkagon ko an bug-os nga kalibotan. An ngatanan ha gawas han arka mamamatay.’

Ginsunod ni Noe ngan han iya mga anak hi Jehova ngan nagtikang ha paghimo han arka. Kondi nagtinawa la an mga tawo. Padayon nga nagbuhat hira hin maraot. Waray bisan usa nga tinuod kan Noe han ginsumatan niya hira han pagbubuhaton han Dios.

Maiha an paghimo han arka tungod kay daku gud ito. Kondi, paglabay hin damu ka tuig, nahuman ito. Yana ginsugo han Dios hi Noe nga pasudlon an mga hayop ha arka. Siring han Dios nga may-ada mga hayop nga tagduha an dadad-on, usa nga lalaki ngan usa nga babaye. Kondi an iba nga hayop tagpito an dadad-on. Nagsiring liwat an Dios ha iya nga dad-on an ngatanan nga klase han katamsihan. Ginsunod ni Noe an ngatanan nga iginsugo han Dios.

Katapos, sinulod liwat ha arka hi Noe ngan an iya pamilya. Ngan ginsadhan han Dios an purtahan hito. Naghulat ha sulod hi Noe ngan an iya pamilya. Hunahunaa nga kaupod ka nira nga naghuhulat ha sulod han arka. Magkakaada gud ba hin baha sugad han ginsiring han Dios?