Hi Saul an nagin siyahan nga hadi han Israel. Kondi iginsalikway hiya ni Jehova, ngan ginpili hi David nga magin kasaliwan nga hadi. Damu an aton mahibabaroan mahitungod kan David. Han batan-on pa hiya, nakig-away hiya ha higante nga hi Goliat. Sunod, pinalagiw hiya tikang ha naaawa nga hi Hadi Saul. Katapos, ginpugngan hiya han mahusay nga hi Abigail ha pagbuhat hin maraot.

Sunod, damu an aton mahibabaroan mahitungod ha anak ni David nga hi Salomon nga sinaliwan kan David ha paghadi ha Israel. An tagsa han siyahan nga tulo nga hadi han Israel nagmando hin 40 ka tuig. Han mamatay hi Salomon, nabahin an Israel ha duha nga ginhadian, an norte ngan an sur nga ginhadian.

An 10-ka-tribo nga ginhadian ha norte nagmando ha sulod hin 257 ka tuig antes ito bungkagon han mga Asiryahanon. Paglabay hin 133 ka tuig, ginbungkag liwat an duha-ka-tribo nga ginhadian ha sur. Hini nga panahon, ginbihag an mga Israelita ngadto ha Babilonya. Salit an panhitabo ha Bahin KWATRO inabot hin 510 ka tuig—mga panhitabo nga waray naton makita.