TINEDYER pa la hi Salomon han nagin hadi hiya. Hinigugma niya hi Jehova, ngan ginsunod niya an mag-opay nga sagdon han iya tatay nga hi David. Nalipay hi Jehova kan Salomon, salit usa ka gab-i nagpakiana Hiya pinaagi han inop: ‘Salomon, ano an karuyag mo nga ihatag ko ha imo?’

Hi Salomon binaton: ‘Jehova nga akon Dios, batan-on pa gud ako ngan diri ako maaram kon paonan-o magmamando. Salit hatagi ako hin kinaadman basi mandoan ko an imo katawohan ha husto nga paagi.’

Nalipay hi Jehova ha gin-aro ni Salomon. Salit Hiya nagsiring: ‘Tungod kay nangaro ka hin kinaadman ngan diri hin hilawig nga kinabuhi o mga bahandi, tatagan ko ikaw hin kinaadman nga labaw kay ha bisan hin-o nga tawo. Kondi tatagan ko liwat ikaw han waray mo aroa, mga bahandi ngan kadungganan.’

Waray pag-iha, duha nga babaye nga may-ada daku nga problema an kinadto kan Salomon. ‘Ako ngan ini nga babaye naukoy ha usa nga balay,’ siring han usa. ‘Nag-anak ako hin lalaki, ngan paglabay hin duha ka adlaw, nag-anak liwat hiya hin lalaki. Usa ka gab-i namatay an iya anak. Kondi samtang nakaturog ako, iginbutang niya an iya patay nga anak ha akon sapit ngan ginkuha an akon anak. Han nagmata ako ngan ginkita an patay nga bata, hinbaroan ko nga diri ito an akon anak.’

Ngan an usa nga babaye nagsiring: ‘Diri ito tinuod! Akon an buhi nga bata, ngan iya an patay nga bata!’ An siyahan nga babaye binaton: ‘Buwa ito! Imo an patay nga bata, ngan akon an buhi!’ Ha sugad hini naglantugi an duha nga babaye. Ano an pagbubuhaton ni Salomon?

Nagpakuha hiya hin espada, ngan han nakada na ito, hiya siniring: ‘Pikasa an buhi nga bata, ngan tagi hira hin tag-tunga.’

‘Ayaw!’ nagsinggit an tinuod nga nanay. ‘Ayaw pagpataya an bata nanginginyupo ako. Ihatag ito ha iya!’ Kondi an usa nga babaye nagsiring: ‘Ayaw ito ihatag ha bisan hin-o ha amon; sige, pikasa ito.’

Katapos, hi Salomon nagsiring: ‘Ayaw pagpataya an bata! Ihatag ito ha siyahan nga babaye. Hiya an tinuod nga nanay.’ Maaram hito hi Salomon tungod kay an tinuod nga nanay nahigugma gud ha iya anak salit mas karuyag pa niya nga ihatag an bata ha usa nga babaye basi diri ito patayon. Han hinbatian han katawohan kon paonan-o ginsulbad ni Salomon an problema, nalipay hira tungod kay maaramon an ira hadi.

Durante han pagmando ni Salomon, ginbendisyonan han Dios an katawohan hin damu nga bunga han trigo, sebada, ubas, igos ngan iba pa nga makakaon nga mga tanom. Mag-opay an panapton ngan balay han mga tawo. Hura hira han ngatanan nga mag-opay nga ira ginkikinahanglan.