ANTES mamatay hi David, iya iginhatag kan Salomon an plano han Dios ha pagtukod han Iya templo. Ha ikaupat ka tuig han pagmando ni Salomon, gintikangan niya an pagtukod han templo, ngan nahuman ito katapos hin pito ngan tunga ka tuig. Napuplo ka yukot nga kalalakin-an an nagtrabaho han templo, ngan daku gud nga kwarta an nagasto ha pagtukod hito tungod kay damu nga bulawan ngan salapi an gin-gamit para hito.

An templo may-ada duha nga dagku nga kwarto, pariho han tabernakulo. Kondi, doble an kadaku han tagsa nga kwarto hito kay ha mga kwarto han tabernakulo. Iginpabutang ni Salomon an arka han kauyonan ha surusulod nga kwarto han templo, ngan iginpakadto ha lain nga kwarto an iba nga butang nga tikang ha tabernakulo.

Han nahuman an templo, nagkaada daku nga selebrasyon. Linuhod hi Salomon ha atubangan han templo ngan nag-ampo, sugad han nakikita mo ha retrato. ‘Diri ka naigo bisan ha bug-os nga langit,’ siring ni Salomon kan Jehova, ‘labi na gud hini nga templo nga akon gintukod. Kondi, O akon Dios, nanginginyupo ako, pamatii an imo katawohan kon makanhi hira hini nga lugar basi mag-ampo.’

Han natapos an pag-ampo ni Salomon, linusad an kalayo tikang ha langit. Nasunog an halad nga mga hayop. Ngan napuno an templo han kalamrag tikang kan Jehova. Ipinapakita hini nga namamati hi Jehova, ngan nalilipay hiya han templo ngan han pag-ampo ni Salomon. Ha templo na napakadto an katawohan basi magsingba, imbes nga ha tabernakulo.

Maiha nga panahon nga nagmando hi Salomon ha maaramon nga paagi, ngan malipayon an katawohan. Kondi nag-asawa hi Salomon hin damu nga kababayin-an nga mga taga-iba nga nasud nga diri nagsisingba kan Jehova. Nakikita mo ba dinhi an usa ha ira nga nagsisingba ha idolo? Ha urhi, naimpluwensyahan hi Salomon han iya mga asawa nga magsingba liwat ha iba nga mga dios. Maaram ka ba kon ano an nahitabo han ginbuhat ini ni Salomon? Diri na maopay an iya pagtagad ha katawohan. Nagin mapintas hiya, salit diri na hira malipayon.

Tungod hini, nasina hi Jehova kan Salomon, ngan ginsidngan hiya: ‘Kukuhaon ko an ginhadian tikang ha imo, ngan ihahatag ko ito ha iba. Diri ko ini bubuhaton samtang buhi ka, kondi durante ha pagmando han imo anak. Pero diri ko kukuhaon tikang ha imo anak an ngatanan nga katawohan han ginhadian.’ Aton kitaon kon paonan-o ini nahitabo.