KITAA an lalaki nga aada ha tubig. Namimeligro gud an iya kinabuhi, diri ba? Lalamuyon na hiya hini nga isda! Kilala mo ba hiya? Hiya hi Jonas. Aton kitaon kon kay ano nga nahingada hiya hini nga makuri nga kahimtang.

Hi Jonas usa nga propeta ni Jehova. Waray pag-iha katapos mamatay hi propeta Eliseo, nagsiring hi Jehova kan Jonas: ‘Kadto ha daku nga syudad han Ninibe. Duro karaot an ginbubuhat han mga tawo didto, ngan karuyag ko nga sumatan mo hira mahitungod hito.’

Kondi diri karuyag ni Jonas nga kumadto. Salit sinakay hiya ha barko nga tipahirayo ha Ninibe. Waray malipay hi Jehova ha paglikay ni Jonas. Salit nagpahinabo Hiya hin makusog nga bagyo. Makusog hinduro ito nga haros malunod na an barko. Nahadlok gud an mga tripulante, salit nangamuyo hira ha ira mga dios nga buligan hira.

Katapos, hi Jonas nagsiring ha ira: ‘Magsiringba ako ni Jehova, an Dios nga naglarang han langit ngan han tuna. Ngan naglikay ako ha ginpapabuhat ni Jehova ha akon.’ Salit an mga tripulante nagpakiana: ‘Ano an amon pagbubuhaton ha imo basi umundang an bagyo?’

‘Ilabog ako ha dagat, ngan magigin malinaw ito utro,’ siring ni Jonas. Diri karuyag han mga tripulante nga buhaton ito, kondi han nagtikakusog an bagyo napiritan hira ha paglabog kan Jonas ha dagat. Dida hito, inundang dayon an bagyo ngan naglinaw utro an dagat.

Han nagtikalunod hi Jonas ha tubig, ginlamoy hiya han daku nga isda. Kondi waray hiya mamatay. Tulo ka adlaw ngan tulo ka gab-i nga nakadto hiya ha tiyan hito nga isda. Nagbasol gud hi Jonas nga waray hiya sumugot kan Jehova ngan waray kumadto ha Ninibe. Salit maaram ka ba kon ano an iya ginbuhat?

Nag-ampo hi Jonas kan Jehova nga buligan hiya. Salit, ginpahinabo ni Jehova nga iluwa han isda hi Jonas ha mamara nga tuna. Katapos hito, kinadto hi Jonas ha Ninibe. Diri ba nagtututdo ini ha aton nga importante gud nga sugton an bisan ano nga ginpapabuhat ha aton ni Jehova?