KITAA hi Samuel nga nagbububo hin lana ha ulo hini nga lalaki. Ini an ginbubuhat han mga Israelita hadto ha usa nga tawo basi ipakita nga pinili hiya sugad nga hadi. Ginsugo ni Jehova hi Samuel nga buboan hin lana an ulo ni Saul. Espesyal ngan mahamot ito nga lana.

Waray maghunahuna hi Saul nga kwalipikado hiya nga magin hadi. ‘Ha tribo ako ni Benjamin, an gigugutiayi nga tribo han Israel. Kay ano nga nasiring ka nga magigin hadi ako?’ siring niya kan Samuel. Naruruyagan hiya ni Jehova tungod kay diri hiya hambog ngan diri nagpapakaimportante. Salit ginpili Niya hi Saul nga magin hadi.

Kondi hi Saul diri pobre o gutiay nga tawo. Riko an iya pamilya, gwapo gud ngan hitaas hiya. Mga 12-pulgada nga mas hitaas hiya kay ha bisan hin-o ha Israel! Malaksi liwat hiya dumalagan, ngan makusog gud. Nalipay an katawohan nga ginpili ni Jehova hi Saul nga magin hadi. Naggugliat hira: ‘Mabuhi ha kadayonan an hadi!’

Makusog gud an mga kaaway han mga Israelita. Padayon nga ginpapakurian nira an mga Israelita. Waray pag-iha, han hadi na hi Saul, nakig-away ha ira an mga Amonitanhon. Salit gintirok ni Saul an damu nga kasundalohan, ngan nagdaog hira. Tungod hini, nalipay an mga Israelita nga hi Saul an ira hadi.

Ha sulod hin damu nga katuigan, nanguna hi Saul ha mga Israelita ha damu nga kadaogan kontra ha ira mga kaaway. May-ada liwat hiya maisog nga anak nga hi Jonatan. Ngan binulig hi Jonatan ha Israel basi magdaog ha damu nga girra. An mga Pilisteohanon pa gihapon an pinakamaraot nga kaaway han mga Israelita. Usa ka adlaw, damu ka yukot nga Pilisteohanon an sinulong ha Israel.

Ginsumatan ni Samuel hi Saul nga maghulat tubtob nga umabot hiya basi maghalad o maghatag hin regalo kan Jehova. Kondi nag-iha pag-abot hi Samuel. Nahadlok hi Saul nga bangin umatake na an mga Pilisteohanon salit hiya na la an naghalad. Han inabot hi Samuel, ginsidngan niya hi Saul nga nagtalapas hiya. ‘Magpipili hi Jehova hin lain nga tawo nga maghahadi ha Israel,’ siring ni Samuel.

Katapos, waray na liwat sumunod hi Saul. Salit ginsidngan hiya ni Samuel: ‘Mas maopay an pagsugot kan Jehova kay ha paghalad han gimaopayi nga karnero. Tungod kay waray mo sunda hi Jehova, diri ka na niya tutugotan nga magpadayon ha paghadi ha Israel.’

May-ada kita mahibabaroan nga maopay nga leksyon tikang hini. Ipinapakita hini nga importante gud an pagsunod pirme kan Jehova. Ngan hinbaroan liwat naton nga an maopay nga tawo, pariho kan Saul, mahimo magbag-o ngan magin maraot. Diri gud naton karuyag nga magin maraot, diri ba?