HAN namatay hi Hadi Jeroboam, magraot an ngatanan nga hadi nga nagmando ha 10-ka-tribo nga ginhadian ha norte han Israel. Hi Hadi Ahab an pinakamaraot ha ngatanan. Maaram ka ba kon kay ano? Usa han daku nga hinungdan amo an iya asawa, an maraot nga hi Rayna Jesebel.

Diri Israelita hi Jesebel. Anak hiya han hadi han Sidon. Nagsisingba hiya ha palso nga dios nga hi Baal, ngan naimpluwensyahan niya hi Ahab ngan an damu nga Israelita nga magsingba liwat kan Baal. Nasisina hi Jesebel kan Jehova ngan damu na nga propeta an iya iginpapatay. An iba kinahanglan magtago ha mga lungib basi diri hira pamatayon. Kon may-ada karuyag hi Jesebel, puydi pa ngani niya ipapatay an usa nga tawo basi la makuha an iya karuyag.

Usa ka adlaw, masurub-on gud hi Hadi Ahab. Salit nagpakiana ha iya hi Jesebel: ‘Kay ano nga masurub-on ka yana?’

‘Tungod han ginsiring ni Nabot ha akon,’ binaton hi Ahab. ‘Karuyag ko unta paliton an iya urubasan. Kondi nagsiring hiya nga diri ito maaakon.’

‘Ayaw kabaraka,’ siring ni Jesebel. ‘Ihahatag ko ito ha imo.’

Salit hi Jesebel nagsurat ha pipira nga lider ha syudad nga inuukyan ni Nabot. ‘Kuha hin pipira nga waray-pulos nga kalalakin-an basi magsiring nga ginpanhimaraot ni Nabot an Dios ngan an hadi,’ nagsiring hiya ha ira. ‘Katapos, dad-a hi Nabot ha gawas han syudad ngan batoha hiya tubtob nga mamatay.’

Han hinbaroan ni Jesebel nga patay na hi Nabot, nagsiring hiya kan Ahab: ‘Kadto na ngan tag-iyaha an iya urubasan.’ Angay gud sirotan hi Jesebel tungod hito nga iya maraot nga ginbuhat, diri ba?

Salit, inabot an panahon nga ginsugo ni Jehova hi Jehu basi sirotan hi Jesebel. Han hinbatian ni Jesebel nga tiabot hi Jehu, nagbutang hiya hin kolorete ha iya mga mata ngan nagpahusay gud. Kondi han inabot hi Jehu ngan nakita hi Jesebel ha bintana, ginsidngan niya an kalalakin-an ha palasyo: ‘Huloga hiya!’ Sinugot an kalalakin-an, sugad han imo nakikita ha retrato. Ginhulog nira hi Jesebel ngan namatay hiya. Ini an kataposan han maraot nga hi Rayna Jesebel.