HAN naghahadi hi David ha Jerusalem, nagin madaugon ha damu nga girra an iya kasundalohan tungod ha bulig ni Jehova. Nagsaad hi Jehova nga ihahatag ha mga Israelita an Kanaan. Ngan yana, ha bulig ni Jehova, nagin ira na an bug-os nga tuna nga iginsaad Niya ha ira.

Maopay nga magmarando hi David. Hinigugma niya hi Jehova. Salit, usa han siyahan nga iya ginbuhat han nasakop nira an Jerusalem, amo an pagdara han arka han kauyonan ni Jehova ngadto ha Jerusalem. Ngan karuyag niya magtukod hin templo nga bubutangan hito.

Han edaran na hi David, nakahimo hiya hin daku nga sala. Maaram hiya nga sala an pagkuha hin butang nga gintatag-iya han iba. Kondi usa ka gab-i, han nakadto hiya ha atop han iya palasyo, pagtamod niya nakakita hiya hin mahusay hinduro nga babaye. Batseba an ngaran hito nga babaye, ngan an iya bana nga hi Uria, usa han mga sundalo ni David.

Karuyag gud ni David hi Batseba salit ginpakadto niya hi Batseba ha palasyo. An iya bana nakadto ha girra. Katapos, nagkaada relasyon hi David ngan hi Batseba ngan hinbaroan ni Batseba nga burod hiya. Nabaraka gud hi David salit nagpadara hiya hin mensahe ha iya lider han kasundalohan nga hi Joab nga ibutang ha prente han araway hi Uria basi mamatay. Han patay na hi Uria, nagin asawa ni David hi Batseba.

Nasina gud hi Jehova kan David. Salit ginsugo Niya an Iya surugoon nga hi Natan nga isumat kan David an iya sala. Nakikita mo dinhi ha retrato hi Natan nga nakikiistorya kan David. Nagbasol gud hi David ha iya ginbuhat salit waray hiya pataya ni Jehova. Kondi nagsiring hi Jehova: ‘Tungod hinin magraot nga imo ginbuhat, magkakaada damu nga kasamok ha imo pamilya.’ Ngan nagkaada gud damu nga kasamok ha pamilya ni David!

Siyahan, namatay an anak ni Batseba. Sunod, naghimo hin paagi an suhag nga anak ni David nga hi Amnon basi mag-usahan an iya bugto nga hi Tamar ngan ginlugos niya ito. Tungod hini, nasina hinduro an anak ni David nga hi Absalon salit ginpatay niya hi Amnon. Paglabay han panahon, nakuha ni Absalon an pag-uyon han damu nga tawo, ngan ginhimo niya an iya kalugaringon nga hadi. Ha urhi, nagdaog hi David ha pakig-away kontra kan Absalon, nga namatay hito nga away. Oo, damu gud an kasamok ha kinabuhi ni David.

Ha sulod hito nga panahon, igin-anak ni Batseba hi Salomon. Han lagas ngan masakiton na hi David, nangalimbasog an iya anak nga hi Adonias nga magin hadi. Dida hito, ginsugo ni David an saserdote nga hi Sadok nga dihogan hin lana an ulo ni Salomon basi ipakita nga hiya an magigin hadi. Waray pag-iha katapos hito, namatay hi David ha edad nga 70. Nagmando hiya ha sulod hin 40 ka tuig, kondi katapos hito, hi Salomon na an hadi han Israel.