KATAPOS patayon ni David hi Goliat, gindara hiya kan Saul han punoan han kasundalohan nga hi Abner. Nalipay gud hi Saul kan David. Ginhimo niya hi David nga lider han kasundalohan ngan ginpaukoy ha iya balay.

Paglabay han panahon, han binalik an kasundalohan tikang ha pakig-away ha mga Pilisteohanon, an kababayin-an nagkanta: ‘Hi Saul nagpatay hin yinukot, kondi hi David nagpatay hin napuplo ka yukot.’ Salit naawa hi Saul tungod kay mas ginpasidunggan hi David kay ha iya. Kondi waray maawa an anak ni Saul nga hi Jonatan. Daku an iya gugma kan David, ngan hinigugma liwat ni David hi Jonatan. Salit nagsaaray hira nga magpapadayon an ira pagin magsangkay.

Maopay magpatokar hi David hin arpa, ngan karuyag ni Saul an iya gintutokar. Kondi usa ka adlaw, tungod han kaawa ni Saul may-ada hiya ginbuhat nga maraot. Samtang nagtutokar hi David han arpa, ginbangkaw hiya ni Saul, ngan nagsiring: ‘Tutuhugon ko hi David ngada ha bungbong!’ Kondi nakalikay hi David, salit waray hiya maigo. Ha iba nga panahon, ginbangkaw na liwat hiya ni Saul kondi waray hiya maigo. Salit nasantop ni David nga kinahanglan mag-ikmat gud hiya.

Nahinunumdoman mo ba an iginsaad ni Saul? Nagsaad hiya nga ihahatag niya an iya anak basi magin asawa han tawo nga makakapatay kan Goliat. Nagsiring hi Saul kan David nga magigin asawa niya an iya anak nga hi Mikal, kondi kinahanglan patayon anay niya an 100 nga kaaway nga Pilisteohanon. Hunahunaa ito! Naglalaom gud hi Saul nga mapapatay han mga Pilisteohanon hi David. Kondi waray nira mapatay hiya, salit iginhatag ni Saul an iya anak nga magin asawa ni David.

Usa ka adlaw, nagsiring hi Saul kan Jonatan ngan ha ngatanan niya nga surugoon nga karuyag niya patayon hi David. Kondi nagsiring hi Jonatan ha iya tatay: ‘Ayaw pagbuhati hin maraot hi David. Waray hiya ginbuhat nga maraot ha imo. Lugod, an ngatanan nga iya ginbuhat nakabulig gud ha imo. Nameligro an iya kinabuhi han ginpatay niya hi Goliat, ngan han nakita mo ito, nalipay ka.’

Namati hi Saul ha iya anak, ngan nagsaad hiya nga diri hiya magbubuhat hin maraot kan David. Salit ginpabalik niya hi David, ngan nagtrabaho utro ha iya ha palasyo. Kondi, usa ka adlaw, han nagtutokar hiya, ginbangkaw na liwat hiya ni Saul. Nakalikay hiya ngan naigo hito an bungbong. Ikatulo na ito ka beses! Naghunahuna hi David nga kinahanglan na hiya pumalagiw!

Hito nga gab-i inuli hi David ha iya balay. Kondi nagsugo hi Saul hin mga sundalo basi patayon hiya. Maaram hi Mikal han plano han iya tatay. Salit ginsumatan niya an iya bana: ‘Kon diri ka pumalagiw yana nga gab-i, patay ka na buwas.’ Hito nga gab-i, ginbuligan ni Mikal hi David nga makapalagiw ngan ha bintana hiya inagi. Mga pito ka tuig nga nagtinago hi David ha iba-iba nga lugar basi diri hiya mabilngan ni Saul.