MAARAM ka ba kon kay ano nga gin-gisi-gisi hini nga tawo an iya panapton? Tungod kay ginsugo hiya ni Jehova nga buhaton ini. Ini nga tawo amo hi Ahias ngan propeta hiya han Dios. Maaram ka ba kon ano an propeta? An propeta amo an ginsusumatan han Dios kon ano an mahitatabo ha tidaraon.

Dinhi ha retrato, kaistorya ni Ahias hi Jeroboam. Hi Jeroboam gintaporan ni Salomon han iba nga buruhaton ha pagtukod. Han iginkatapo ni Ahias hi Jeroboam dida hini nga dalan, may-ada ginbuhat hi Ahias nga naiiba. Ginhukas niya an iya bag-o nga panapton ngan gin-gisi ito ha 12 ka bahin. Nagsiring hiya kan Jeroboam: ‘Kuhaa an 10 ka bahin.’ Maaram ka ba kon kay ano nga gintagan hi Jeroboam hin 10 ka bahin?

Iginsumat ni Ahias nga kukuhaon ni Jehova an ginhadian tikang kan Salomon. Nagsiring hiya nga ihahatag ni Jehova an 10 nga tribo kan Jeroboam. Nangangahulogan ini nga duha na la nga tribo an mahisasalin nga mamandoan han anak ni Salomon nga hi Rehoboam.

Han hinbatian ni Salomon an ginsiring ni Ahias kan Jeroboam, nasina gud hiya. Gin-iparatay niya hi Jeroboam. Kondi pinalagiw hi Jeroboam ngadto ha Ehipto. Waray pag-iha namatay hi Salomon. Naghadi hi Salomon ha sulod hin 40 ka tuig, kondi yana an iya anak nga hi Rehoboam an sinaliwan nga hadi. Ha Ehipto, hinbatian ni Jeroboam nga patay na hi Salomon, salit binalik hiya ha Israel.

Diri maopay nga hadi hi Rehoboam. Mas mapintas pa ngani hiya kay ha iya amay nga hi Salomon. Hi Jeroboam ngan an iba nga prominente nga kalalakin-an kinadto kan Hadi Rehoboam basi hangyoon hiya nga magin buotan ha katawohan. Kondi waray mamati hi Rehoboam. Ha pagkamatuod, nagin mas mapintas pa gud hiya. Tungod hito, hi Jeroboam an ginpili nga hadi han 10 nga tribo, kondi hi Rehoboam la gihapon an ginkilala nga hadi han tribo han Benjamin ngan Juda.

Diri karuyag ni Jeroboam nga kumadto an katawohan ha Jerusalem basi magsingba ha templo ni Jehova. Salit naghimo hiya hin duha nga bulawan nga baka ngan ginpasingba hito an katawohan han 10-ka-tribo nga ginhadian. Waray pag-iha, nagtikaduro an krimen ngan kamadarahog hito nga tuna.

May-ada liwat kasamok ha duha-ka-tribo nga ginhadian. Waray pa maglima ka tuig tikang nga naghadi hi Rehoboam, nakig-away an hadi han Ehipto ha Jerusalem. Ginkuha han hadi han Ehipto an damu nga bahandi tikang ha templo ni Jehova. Salit, an orihinal nga hitsura han templo waray magpabilin ha maiha nga panahon.