INI an retrato han paraiso nga posible nga ipinakita han Dios ha iya propeta nga hi Isaias. Natawo hi Isaias waray pag-iha katapos mamatay hi Jonas.

An paraiso nangangahulogan hin “hardin” o “parke.” Diri ba ini nagpapahinumdom ha imo han aton nakita na hini nga libro? Puropariho gud ini han makaruruyag nga hardin nga ginhimo ni Jehova nga Dios para kanda Adan ngan Eva, diri ba? Kondi magigin paraiso gud ba an bug-os nga tuna?

Nagsiring hi Jehova kan propeta Isaias nga magsurat mahitungod han tiarabot nga bag-o nga paraiso para ha katawohan han Dios. Hiya nagsiring: ‘An lobo ngan an nati nga karnero maglulungon nga mamurayawon. An nati nga baka ngan an nati nga leon urosa nga mangangaon, ngan gutiay nga bata an magmamangno ha ira. Bisan an minasus-an diri tutukbon kon mag-uyag hiya hirani ha malara nga halas.’

‘Diri gud ini mahitatabo,’ damu an masiring. ‘Pirme masamok an kalibotan, ngan magigin sugad na gud ito pirme.’ Kondi hunahunaa ini: Ano nga klase hin urukyan an iginhatag han Dios kanda Adan ngan Eva?

Iginbutang han Dios hira Adan ngan Eva ha paraiso. Kondi tungod kay waray hira sumugot ha Dios, ira nawara an ira makaruruyag nga urukyan, nalagas hira ngan namatay. Nagsasaad an Dios nga ihahatag niya ha mga tawo nga nahigugma ha iya an mga nawara nira Adan ngan Eva.

Ha tiarabot nga bag-o nga paraiso, waray na mag-aantos o mamamatay. Magkakaada na tinuod nga kamurayawan. An ngatanan nga tawo magigin mahimsog ngan malipayon. Magigin sugad gud ito ha orihinal nga katuyoan han Dios. Aton mahibabaroan ha urhi kon paonan-o ito pagbubuhaton han Dios.