GINDARA ni Hadi Nabukodonosor an ngatanan nga edukado gud nga Israelita ngadto ha Babilonya. Katapos, ginpili niya an pinakagwapo ngan pinakabaltok nga mga batan-on. Upat ha ira an mga batan-on nga imo nakikita dinhi. An usa amo hi Daniel, ngan an tulo gintatawag han mga Babilonyahanon nga Sadrak, Mesak ngan Abednego.

Plano ni Nabukodonosor nga bansayon an mga batan-on basi magtrabaho ha iya palasyo. Katapos hin tulo ka tuig nga pagbansay, pipilion la niya an pinakabaltok ha ira basi bumulig ha iya ha pagsulbad han mga problema. Karuyag han hadi nga magin makusog ngan mahimsog hira samtang ginbabansay. Salit ginsugo niya an iya mga surugoon nga hatagan hira ngatanan hin magrasa nga pagkaon ngan alaksiw nga pariho han ginkakaon niya ngan han iya pamilya.

Kitaa an batan-on nga hi Daniel. Maaram ka ba kon ano an iya gin-iistorya ha lider nga opisyal ha palasyo ni Nabukodonosor nga hi Aspenas? Nasiring hi Daniel nga diri niya karuyag kumaon han magrasa nga pagkaon ha lamesa han hadi. Kondi nabaraka hi Aspenas. ‘An hadi an nagbubuot kon ano an iyo kakaunon ngan iinumon,’ siring niya. ‘Ngan kon diri kamo magin mahimsog pariho han iba nga batan-on, papatayon niya ako.’

Salit nakiistorya hi Daniel ha tinaporan ni Aspenas ha pagmangno ha iya ngan ha iya tulo nga sangkay. ‘Alayon sarihi an imo mga surugoon ha sulod hin 10 ka adlaw,’ siring niya. ‘Tagi kami hin mga utan nga kakaunon ngan tubig nga iinumon. Katapos, itanding kami ha iba nga batan-on nga kalalakin-an nga nakaon han pagkaon han hadi, ngan kitaa kon hin-o an mas maopay pagkit-on.’

Inuyon hini an tinaporan. Ngan katapos han 10 ka adlaw, mas mahimsog pagkit-on hi Daniel ngan an iya tulo nga sangkay kay ha ngatanan nga batan-on. Salit inuyon an tinaporan nga padayon nga kumaon hira hin utan imbes han pagkaon han hadi.

Paglabay hin tulo ka tuig, gindara kan Nabukodonosor an ngatanan nga batan-on. Katapos makaistorya han hadi an ngatanan, naobserbahan niya nga hi Daniel ngan an iya tulo nga sangkay amo an pinakabaltok ha ira. Salit ginpaukoy niya hira ha palasyo basi makabulig ha iya. Ngan kon an hadi nagpapakiana o nagpipresentar hin makuri nga mga problema kanda Daniel, Sadrak, Mesak ngan Abednego, 10 ka pilo nga mas maaram hira kay ha bisan hin-o han iya mga saserdote o maaramon nga kalalakin-an.