KITAA inin batan-on nga lalaki nga gintitinawaan han mga tawo. Maaram ka ba kon hin-o hiya? Hiya hi Jeremias. Kilala gud hiya nga propeta han Dios.

Waray pag-iha katapos tikangan ni Hadi Josia an pagbungkag han mga idolo ha bug-os nga nasud, ginsidngan ni Jehova hi Jeremias nga magin Iya propeta. Kondi, naghunahuna hi Jeremias nga batan-on pa gud hiya para magin propeta. Pero nagsiring hi Jehova nga bubuligan Niya hi Jeremias.

Ginsidngan ni Jeremias an mga Israelita nga umundang na ha pagbuhat han maraot. ‘Mga palso nga dios an ginsisingba han katawohan,’ siring niya. Kondi mas karuyag han damu nga Israelita nga magsingba ha palso nga mga dios imbes nga magsingba ha matuod nga Dios nga hi Jehova. Han ginsidngan ni Jeremias an katawohan nga sisirotan hira han Dios tungod han ira karaotan, nagtinawa la hira ha iya.

Linabay an katuigan. Namatay hi Josia, ngan paglabay hin tulo ka bulan, nagin hadi an iya anak nga hi Jehoyakim. Padayon nga ginsumatan ni Jeremias an katawohan: ‘Bubungkagon an Jerusalem kon diri kamo magbag-o ha iyo magraot nga binuhatan.’ Ginrabot hiya han mga saserdote ngan ginsinggitan: ‘Angay ka patayon tungod hini nga imo ginpipinanyakan.’ Katapos, ira ginsidngan an mga prinsipe han Israel: ‘Angay patayon hi Jeremias tungod kay nananagna hiya kontra ha aton syudad.’

Ano an pagbubuhaton ni Jeremias yana? Waray hiya mahadlok! Ginsidngan niya hira ngatanan: ‘Ginsugo ako ni Jehova nga igyakan ini ha iyo. Kon diri niyo bag-ohon an iyo magraot nga binuhatan, bubungkagon ni Jehova an Jerusalem. Kondi tigamni niyo ini: Kon iyo ako patayon, papatayon niyo an usa nga tawo nga waray ginbuhat nga maraot.’

Waray pataya han mga prinsipe hi Jeremias, kondi waray magbag-o an mga Israelita ha ira magraot nga binuhatan. Paglabay han panahon, inabot an hadi han Babilonya nga hi Nabukodonosor ngan nakig-away ha Jerusalem. Katapos, gin-uripon hira ni Nabukodonosor. Yinukot nga Israelita an iya ginbihag ngan gindara ngadto ha Babilonya. Hunahunaa la kon ano an imo aabaton kon ginkuha ka ha imo nasud han mga tawo nga diri mo kilala ngan gindara ka ngadto ha iba nga nasud!