Kapitulo 16

Aktibo ha Pagsingba kan Jehova

HI Jesus may kabugtoan ha iroy—an iba pa nga anak ni Maria—hira Santiago, Jose, Simon, ngan Judas. Antes hira ngatanan inupod kan Jesus ngan ha iya mga disipulo ha pagbiyahe ngadto ha Capernaum, nga usa nga syudad hirani ha Dagat han Galilea, bangin inuli anay hira ha ira balay ha Nazaret basi maimpake han pamilya an ira mga kinahanglanon.

Pero kay ano nga ha Capernaum bubuhaton ni Jesus an iya ministeryo imbes nga ha Cana, ha Nazaret, o ha iba nga lugar ha kabungtoran han Galilea? Tungod kay maopay an lokasyon hito ngan durodaku ito nga syudad. Kadam-an liwat han iya bag-o nga mga disipulo naukoy ha Capernaum o ha hirani hito, salit diri na nira kinahanglan bumaya didto basi niya bansayon.

Han nakadto hi Jesus ha Capernaum, naghimo hiya hin mga milagro, sugad han iya mismo ginsiring paglabay hin pipira ka bulan. Pero waray pag-iha, nagbiyahe na liwat hiya ngan an iya mga kaupod. Katsaringsing (Marso o Abril) hadto, ngan tikadto hira ha Jerusalem basi magselebrar han Paskua han 30 C.E. Didto, an mga disipulo may nakita kan Jesus nga bangin waray pa nira makita ha iya.

Sumala ha Balaud han Dios, an mga Israelita kinahanglan maghalad hin mga hayop. Salit, basi magin kombinyente para ha ira, an mga negosyante ha Jerusalem nagbabaligya hin mga hayop o mga tamsi. Kondi ha sulod mismo han templo hira nagbabaligya, ngan ginlilimbongan nira an mga tawo kay duro kamahal an ira pagbaligya.

Nasina hi Jesus salit naghimo hiya hin latigo nga pisi ngan ginpaiwas an mga parabaligya. Ginhuwad niya an mga sinselyo han mga parabalyo hin kwarta ngan ginbalintong an ira mga lamesa. Gin-guliatan niya an mga nagbabaligya hin sarapati: “Kuhaa niyo dinhi ini nga mga butang! Ayaw himoa nga baraligyaan an balay han akon Amay!”

Han nakita ito han mga disipulo, nahinumdoman nira an tagna mahitungod han Anak han Dios: “An pagin aktibo para ha imo balay naglalaga ha sulod ko.” Pero nagpakiana an mga Judio: “Ano nga tigaman an imo ipapakita ha amon basi pamatud-an nga may katungod ka ha pagbuhat hini?” Binaton hi Jesus: “Bungkaga niyo ini nga templo, ngan titindugon ko utro ini ha sulod hin tulo ka adlaw.”

Kahuna han mga Judio nga an literal nga templo an ginsisiring ni Jesus, salit nagpakiana hira: “Gintindog ini nga templo ha sulod hin 46 ka tuig, pero titindugon mo ini ha sulod hin tulo la ka adlaw?” Kondi an templo nga iya ginsisiring amo an iya lawas. Paglabay hin tulo ka tuig, nahinumdoman han iya mga disipulo ito nga ginsiring ni Jesus han ginbanhaw hiya. Juan 2:12-22; Mateo 13:55; Lucas 4:23.

▪ Katapos han kasal ha Cana, ano nga mga lugar an ginkadtoan ni Jesus?

▪ Kay ano nga nasina hi Jesus, ngan ano an iya ginbuhat?

▪ Ano an nahinumdoman han mga disipulo han nakita nira an ginbuhat ni Jesus?

▪ Ano an ginsiring ni Jesus mahitungod han “templo,” ngan ano an iya karuyag sidngon?