Kapitulo 12

An Bawtismo ni Jesus

MGA unom ka bulan tikang nga nagsangyaw hi Juan, kinadto ha iya ha Jordan an 30 anyos nga hi Jesus. Kay ano? Basi bumisita? Karuyag la ba hibaroan ni Jesus an pag-uswag han buruhaton ni Juan? Diri. Naghangyo hiya kan Juan nga bawtismohan hiya.

Nagbaribad dayon hi Juan: “Ako an kinahanglan mo bawtismohan, pero ikaw an napakanhi ha akon?” Maaram hi Juan nga an iya patod nga hi Jesus espesyal nga Anak han Dios. Han iginbuburod hiya han iya nanay, nagkiwa pa ngani hiya tungod han daku nga kalipay han binisita ha ira hi Maria samtang burod kan Jesus! Sigurado nga ginsumatan hiya han iya nanay nga hi Elizabeth mahitungod hini. Posible nga ginsumatan liwat hiya mahitungod han pagpahibaro han anghel han katawo ni Jesus ngan han pagpakita han mga anghel ha mga paraataman hin mga karnero ha gab-i han natawo hi Jesus.

Salit kilala ni Juan hi Jesus. Ngan maaram hiya nga an iya pagbawtismo diri para kan Jesus. Para ito ha mga nagbabasol han ira mga sala, pero hi Jesus waray sala. Kondi, bisan nagbaribad hi Juan, nagpirit hi Jesus: “Ayaw ako pagpugngi, kay hini nga paagi kinahanglan buhaton naton an ngatanan nga matadong.”

Kay ano nga husto nga bawtismohan hi Jesus? Tungod kay an iya bawtismo nagsisimbolo, diri ha pagbasol han mga sala, kondi ha pagpresentar han iya kalugaringon ha pagbuhat han kaburut-on han iya Amay. Panday hiya, pero yana panahon na basi tikangan niya an ministeryo nga iginpapabuhat ni Jehova nga Dios dinhi ha tuna. Ha imo paghunahuna, naglalaom ba hi Juan nga may urusahon nga mahitatabo kon bawtismohan niya hi Jesus?

Ini an siring ni Juan: “An Dios nga nagsugo ha akon nga magbawtismo ha tubig nagsiring ha akon, ‘Kon makita mo an espiritu nga nalusad ngan nagpapabilin ha iya, ini hiya an nagbabawtismo pinaagi han baraan nga espiritu.’” Salit naglalaom hi Juan nga malusad an espiritu han Dios ha usa nga iya babawtismohan. Kon sugad, posible nga waray na hiya mahipausa han nakita niya “an espiritu han Dios nga sugad hin sarapati nga nalusad ngada kan Jesus” han hinaw-as hiya ha tubig.

Kondi may iba pa nga nahitabo han ginbawtismohan hiya. “An langit naabrihan” ha iya. Ano an iginpapasabot hini? Nagpapasabot ini nga han ginbabawtismohan hiya, nahinumdoman niya an iya kinabuhi ha langit. Salit nahinunumdoman na niya an iya kinabuhi sugad nga espiritu nga anak ni Jehova nga Dios, pati na an ngatanan nga ginsiring ha iya han Dios han nakadto pa hiya ha langit antes magin tawo.

Dugang pa, han ginbabawtismohan hiya, may tingog tikang ha langit nga nagsiring: “Ini an akon Anak nga hinigugma, nga akon nalilipayan.” Kan kanay ito tingog? Kan Jesus ba? Diri! Tingog ito han Dios. Matin-aw nga hi Jesus an Anak han Dios, diri nga hiya an Dios, sugad han gintotoohan han iba.

Kondi, hi Jesus tawo nga anak han Dios, sugad la han siyahan nga tawo, hi Adan. Katapos isaysay han disipulo nga hi Lucas an bawtismo ni Jesus, hiya nagsurat: “Han nagtikang hi Jesus ha iya buruhaton, 30 anyos na hiya. Sumala han ginhuhunahuna han mga tawo, hiya an anak ni Jose, nga anak ni Heli, . . . nga anak ni David, . . . nga anak ni Abraham, . . . nga anak ni Noe, . . . nga anak ni Adan, nga anak han Dios.”

Hi Adan tawo nga “anak han Dios,” pati hi Jesus nga pinakabantogan nga tawo nga nabuhi. Nagigin matin-aw ito kon uusisahon naton an iya kinabuhi. Pero han ginbawtismohan hiya, nagkaada hiya bag-o nga relasyon ha Dios, nagin espirituwal nga Anak hiya han Dios. Hito nga panahon, sugad hin gintawag utro hiya ha langit han ginsugo hiya han Dios nga tikangan na an buruhaton, nga magriresulta ha paghatag han iya tawhanon nga kinabuhi ha kadayonan sugad nga halad para ha ginhukman nga katawohan. Mateo 3:13-17; Lucas 3:21-38; 1:34-36, 44; 2:10-14; Juan 1:32-34; Hebreo 10:5-9.

▪ Kay ano nga kilala ni Juan hi Jesus?

▪ Kay ano nga ginbawtismohan hi Jesus nga waray man hiya nabuhat nga sala?

▪ Kay ano nga waray na mahipausa hi Juan han an espiritu han Dios linusad ngada kan Jesus?