Kapitulo 53

An Ginhihingyap nga Hadi

HAN milagroso nga nagpakaon hi Jesus hin yinukot, nahipausa gud an mga tawo. “Ini gud an propeta nga igintagna nga makanhi ha kalibotan,” siring nira. Naghunahuna hira nga hi Jesus diri la an propeta nga labaw pa kan Moises, pero hiya liwat an magigin pinakamaopay nga magmarando. Salit nagplano hira nga piriton hiya nga magin hadi.

Pero maaram hiya han plano han mga tawo. Salit ginios dayon hiya basi diri hiya mapirit han ira karuyag. Ginpalakat niya an mga tawo ngan ginpasakay ha baluto an mga disipulo ngan ginpabalik ha Capernaum. Katapos, kinadto hiya ha bukid basi mag-ampo. Nag-uusahan la hiya hito nga gab-i.

Han kaagahon na, samtang nakadto hi Jesus ha hitaas nga lugar, nakikita niya an dagku nga balud tungod han makusog nga hangin. Haros kadayaw na, kay hirani na an Paskua, salit nakikita niya an baluto nga ginsasakyan han mga disipulo. Bisan kon naniniguro gud hira ha pagbinugsay, makuri hira makaabante kay nasungsong hira ha mga balud.

Tungod hito, linusad hi Jesus tikang ha bukid ngan naglakat ha bawbaw han mabalud nga dagat pakadto ha baluto. Mga lima o unom ka kilometro na an kahirayo han baluto han naabtan niya ito. Pero baga hin lalabyan la niya hira. Pakakita ha iya han mga disipulo, naggugliat hira: “Urusahon gud ini nga bisyon!”

Ginparig-on hira ni Jesus: “Ako ini, ayaw kamo kahadlok.”

Pero hi Pedro nagsiring: “Ginoo, kon ikaw ito, palakta ako ngada ha imo ha bawbaw han tubig.”

“Kadi!” siring ni Jesus.

Salit hinaw-as hi Pedro ha baluto ngan naglakat ha bawbaw han tubig tipakadto kan Jesus. Pero han ginkinita ni Pedro an makusog nga subasko, nahadlok hiya ngan nagtikalunod, salit nagsinggit hiya: “Ginoo, talwasa ako!”

Ginkaptan dayon hiya ni Jesus ngan nagsiring: “Kagutiay han imo pagtoo. Kay ano nga nagruruhaduha ka?”

Pakasakay nira Pedro ngan Jesus ha baluto, kinalma an subasko, ngan nahipausa gud an mga disipulo. Pero angay ba hira mahipausa? Kon nasabtan nira “an leksyon han milagro may kalabotan han tinapay” nga ginhimo ni Jesus pipira ka oras pa la an naglabay, han ginpakaon niya an yinukot pinaagi la hin lima nga tinapay ngan duha nga gudtiay nga isda, diri unta hira mahipapausa nga nakalakat hiya ha tubig ngan napakalma an hangin. Pero yana an mga disipulo yinukbo ha iya ngan nagsiring: “Ikaw gud an Anak han Dios.”

Waray pag-iha, inabot hira ha Genesaret, usa nga maopay pagkit-on ngan mabungahon nga kapatagan hirani ha Capernaum. Didto nira ginpundo an baluto. Pero pakahaw-as nira, nakilal-an hi Jesus han mga tawo ngan nagdadlagan hira pagsumat ha iba nga umurukoy hito nga lugar. Ginpamiling nira an mga may sakit ngan gindara nga nakahigda ha tiheras ngadto kan Jesus. Pakakapot nira bisan la ha sidsid han iya pantungbaw nga panapton, nag-opay hira.

Ha luyo nga bahin, an mga tawo nga nakadto han milagroso nga ginpakaon ni Jesus an yinukot nahibaro nga binaya hiya. Salit han inabot an gudtiay nga baluto tikang ha Tiberias, sinakay hira ngan kinadto ha Capernaum basi bilngon hi Jesus. Han nakita nira hiya, nagpakiana hira: “Rabbi, kakan-o ka inabot dinhi?” Ginsaway hira ni Jesus sugad han aton mahibabaroan. Juan 6:14-25; Mateo 14:22-36; Marcos 6:45-56.

▪ Katapos nga milagroso nga ginpakaon ni Jesus an yinukot, ano an karuyag buhaton han mga tawo ha iya?

▪ Ano an nakita ni Jesus han nakadto hiya ha bukid? Ano an iya ginbuhat?

▪ Kay ano nga diri angay mahipausa hito an mga disipulo?

▪ Ano an nahitabo han nakaduong na hira?