Kapitulo 6

An Iginsaad nga Bata

IMBES nga bumalik ha Nazaret, nagpabilin ha Betlehem hira Jose ngan Maria. Han walo ka adlaw na an edad ni Jesus, ginturi hiya uyon ha Balaud han Dios nga iginhatag kan Moises. Posible liwat nga hito nga adlaw kustomre an paghatag hin ngaran ha bata nga lalaki. Salit an bata ginngaranan nira nga Jesus, sugad han iginsugo han anghel nga hi Gabriel.

Paglabay hin sobra usa ka bulan, hi Jesus 40 ka adlaw na an edad. Diin hiya dad-a han iya kag-anak? Ha templo ha Jerusalem nga pipira la ka kilometro tikang ha ira inuukyan. Sumala ha Balaud han Dios, ha ika-40 ka adlaw katapos manganak hin lalaki an usa nga babaye, kinahanglan magdara hiya ha templo hin halad ha pagputli.

Ito an ginbuhat ni Maria. Nagdara hiya hin duha nga gutiay nga tamsi sugad nga halad. Iginpapakita hini an kahimtang ha pinansyal nira Jose ngan Maria. Sumala ha Balaud, nati nga karnero nga lalaki nga mas mahal kay ha mga tamsi an sadang ighalad. Pero kon diri ini maaakos han nanay, puydi na an duha nga tukmo o duha nga sarapati.

Didto ha templo, ginkugos hi Jesus han lagas nga lalaki nga hi Simeon. Iginpahayag ha iya han Dios nga diri hiya mamamatay tubtob nga diri pa niya makita an iginsaad ni Jehova nga Kristo o Mesias. Hito nga adlaw, han kinadto hi Simeon ha templo, gin-giyahan hiya han baraan nga espiritu ngadto ha bata nga gindara nira Jose ngan Maria.

Han ginkukugos ni Simeon hi Jesus, nagpasalamat hiya ha Dios: “Soberano nga Ginoo, an imo uripon puydi na yana mamatay nga mamurayawon sumala ha imo ginsiring, kay nakita ko na an imo gagamiton ha pagtalwas nga imo igintagana basi makita han ngatanan nga katawohan. Hiya an kalamrag nga magkukuha han kasisidman nga nalambong ha mga nasud ngan hiya an himaya han Israel nga imo katawohan.”

Nahipausa hira Jose ngan Maria hini nga ira hinbatian. Gindayaw hira ni Simeon, ngan nagsiring kan Maria nga an iya anak “magigin hinungdan han kapukan ngan pagbangon utro han damu ha Israel,” ngan an kasubo, nga pariho hin matarom nga espada, magbubuno han iya kalag.

Hito nga panahon nakadto liwat an 84 anyos nga propetisa nga hi Ana. Diri gud hiya napalya ha pagkadto ha templo. Hito mismo nga oras, dinaop hiya ha ira ngan nagpasalamat ha Dios ngan nag-inistorya mahitungod kan Jesus ha ngatanan nga mamamati.

Nalipay gud hira Jose ngan Maria hini nga nahitabo ha templo! Sigurado nga ito ngatanan nagpamatuod ha ira nga an bata amo an Usa nga Iginsaad han Dios. Lucas 2:21-38; Lebitiko 12:1-8.

▪ San-o gintatagan hin ngaran an bata nga lalaki ha Israel uyon ha kustomre?

▪ Ano an kinahanglan buhaton han usa nga nanay ha Israel kon 40 ka adlaw na an edad han iya anak nga lalaki? Ha pagtuman ni Maria hito nga sugo, ano an iginpapakita hito mahitungod han iya kahimtang ha pinansyal?

▪ Hira hin-o an nakakilala kan Jesus, ngan ha ano nga paagi?