Kapitulo 100

An Ilustrasyon Mahitungod han mga Mina

POSIBLE nga aadto pa hi Jesus ha balay ni Sakeo kay hinapit hiya han tipakadto hira ha Jerusalem. Naghunahuna an mga disipulo nga pag-abot nira didto, ipapahayag ni Jesus nga hiya an Mesias ngan titindugon an iya Ginhadian. Basi tadungon an ira panhunahuna ngan ipakita nga maiha pa umabot an Ginhadian, naghatag hiya hin ilustrasyon:

“Usa nga tawo tikang ha hadianon nga pamilya an magbibiyahe ha hirayo nga nasud basi makarawat gud niya an pagkahadi, ngan katapos hito mabalik hiya.” Hi Jesus amo an “tawo tikang ha hadianon nga pamilya,” ngan an langit amo an “hirayo nga nasud.” Pag-abot ni Jesus didto, tatagan hiya han iya Amay hin awtoridad ha paghadi.

Pero antes magbiyahe, nagtawag an tawo hin napulo nga uripon ngan gintagan an kada tagsa hin silber nga mina ngan ginsidngan: “Pagnegosyo kamo tubtob ha akon pagbalik.” An napulo nga uripon nagrirepresentar han siyahan nga mga disipulo ni Jesus. Pero nagrirepresentar liwat hira han ngatanan nga may paglaom nga magin manurunod upod niya ha Ginhadian ha langit.

An silber nga mga mina daku nga kantidad hin kwarta, kay an tagsa hito katugbang han tulo ka bulan nga sweldo han parag-uma. Pero ano an ginrirepresentaran han mga mina? Ngan ha ano nga klase hin negosyo ito gagamiton han mga uripon?

An mga mina nagrirepresentar hin mga panag-iya nga magagamit han mga disipulo nga igin-anak pinaagi han espiritu ha pagtirok hin mas damu nga manurunod han Ginhadian ha langit tubtob ha pag-abot ni Jesus sugad nga Hadi ha iginsaad nga Ginhadian. Katapos han iya pagkabanhaw ngan pagpakita ha mga disipulo, gintagan niya hira han simboliko nga mga mina para manhimo hin dugang nga disipulo, salit madudugangan an grupo nga magigin manurunod han Ginhadian ha langit.

“Pero an iya mga igkasi-tuminungnong,” siring ni Jesus, “nasina ha iya [ha tawo nga tikang ha hadianon nga pamilya] ngan nagsugo hin mga embahador basi magsiring ha iya, ‘Diri kami naruruyag nga maghadi ka ha amon.’” Ito nga mga tuminungnong amo an mga Israelita, o mga Judio, diri upod an mga disipulo. Han kinadto na hi Jesus ha langit, iginpakita hito nga mga Judio nga nadiri hira ha iya nga magin hadi pinaagi ha pagtimaraot ha iya mga disipulo. Hito nga paagi pariho hira han mga tuminungnong nga nagsugo hin mga embahador.

Paonan-o gin-gamit han napulo nga uripon an ira mga mina? Nagsaysay hi Jesus: “Pagbalik niya katapos makarawat an pagkahadi, iya iginpatawag an mga uripon nga gintagan niya hin silber nga kwarta basi hibaroan kon pira an ira ganansya ha pagnegosyo. An siyahan dinaop ngan nagsiring, ‘Ginoo, an imo mina nakaganansya hin napulo ka mina.’ Salit nagsiring hiya ha uripon, ‘Maopay an imo ginbuhat, matataporan nga uripon! Tungod kay iginpakita mo nga matinumanon ka ha gutiay nga butang, tatagan ko ikaw hin awtoridad ha napulo nga syudad.’ Dinaop an ikaduha nga uripon ngan nagsiring, ‘Ginoo, an imo mina nakaganansya hin lima ka mina.’ Nagsiring liwat hiya hini nga uripon, ‘Magdudumara ka liwat hin lima nga syudad.’”

An uripon nga may napulo nga mina nagrirepresentar hin klase, o grupo, han mga disipulo tikang han Pentekostes 33 C.E. tubtob yana upod na an mga apostol. An uripon nga nakaganansya hin lima ka mina nagrirepresentar liwat hin grupo han mga disipulo durante ha pariho nga panahon, nga nagpadamu han mga panag-iya ha tuna han ira hadi sumala ha ira mga oportunidad ngan mga abilidad. Iton duha nga grupo aktibo nga nagsasangyaw han maopay nga sumat, salit damu nga tangkod an kasingkasing an nagin mga Kristiano. Siyam han mga uripon an naglampos ha ira negosyo ngan napatubo an ira mga puhunan.

Nagsiring pa hi Jesus: “Pero dinaop an usa pa nga uripon ngan nagsiring, ‘Ginoo, aadi an imo mina nga ginputos ko hin tela. Nahahadlok ako ha imo kay istrikto ka; imo ginkukuha an waray mo ideposito ngan gin-aani an waray mo igsabwag.’ Nagsiring hiya ha uripon, ‘Tungod han imo ginsiring, ginhuhukman ko ikaw, maraot nga uripon. Diri ba maaram ka nga istrikto ako, nga ginkukuha ko an waray ko ideposito ngan gin-aani an waray ko igsabwag? Salit, kay ano nga waray mo ibutang ha bangko an akon silber nga kwarta? Basi pag-abot ko, makuha ko unta ito pati an tubo.’ Tungod hito nagsiring hiya ha mga naninindog didto, ‘Kuhaa ha iya an mina ngan ihatag ito ha may napulo ka mina.’”

An pagkuhaa han simboliko nga mina ha maraot nga uripon nangangahulogan hin pagkuhaa han iya pwesto ha Ginhadian ha langit. Oo, nawara ha iya an pribilehiyo nga magmando ha napulo nga syudad o lima nga syudad, siring pa. Tigamni liwat nga an uripon iginpahayag nga maraot, diri tungod han anoman nga karaotan nga iya ginbuhat, kondi tungod kay waray hiya magtrabaho basi madugangan an bahandi han ginhadian han iya agaron.

Han an mina han maraot nga uripon iginhatag ha siyahan nga uripon, nagreklamo hiya: “Ginoo, may-ada na hiya napulo ka mina!” Pero binaton hi Jesus: “An bisan hin-o nga may-ada na, dudugangan pa, pero an waray, kukuhaon bisan an aada ha iya. Dad-a niyo nganhi an akon mga kaaway nga diri naruruyag nga maghadi ako ha ira, ngan pataya hira ha akon atubangan.” Lucas 19:11-27; Mateo 28:19, 20.

▪ Kay ano nga naghatag hi Jesus hin ilustrasyon mahitungod han mga mina?

▪ Hin-o an tawo tikang ha hadianon nga pamilya, ngan ano an nasud nga iya kakadtoan?

▪ Hin-o an mga uripon, ngan ano an ginrirepresentaran han mga mina?

▪ Hin-o an mga tuminungnong, ngan paonan-o nira iginpakita an ira kasina?

▪ Kay ano nga an usa nga uripon gintawag nga maraot? Ano an kahulogan han kawad-i niya hin mina?