Kapitulo 39

An Mapahitas-on Ngan an Mapainubsanon

KATAPOS dayawon ni Jesus hi Juan nga Parabaptis, gintagan niya hin atensyon an mapahitas-on ngan maruhaduhaon nga mga tawo ha iya palibot. “Ini nga henerasyon,” siring niya, “pariho ini hin kabataan nga nangangalingkod ha mga merkado ngan nagsisinggit ha ira mga kauyag, nga nasiring: ‘Nagplawta kami para ha iyo pero waray kamo sumayaw, nagnguyngoy kami pero waray kamo magpukpok han iyo dughan tungod ha kasubo.’”

Ano an karuyag sidngon ni Jesus? Nagsaysay hiya: “Kinanhi hi Juan nga diri nakaon o nainom, pero an mga tawo nasiring, ‘May demonyo hiya.’ An Anak han tawo kinanhi nga nakaon ngan nainom, pero an mga tawo nasiring la gihapon, ‘Kitaa! An tawo nga malamon ngan parainom hin bino, sangkay han mga parasukot hin buhis ngan magpakasasala.’”

Imposible nga makontento an mga tawo. Waray gud nakakapalipay ha ira. Sugad nga Nazareo, hi Juan nagkinabuhi hin simple ngan waray magpatakas han iya karuyag basi sundon an ginsiring han anghel nga “diri gud hiya uminom hin bino ngan mapintas nga irinmon.” Pero an mga tawo nagsiring nga may demonyo hiya. Ha luyo nga bahin, nagkinabuhi hi Jesus pariho han iba nga tawo, ngan waray magin sugad hin ermitanyo, pero gin-akusaran hiya nga nagpapatakas.

Makuri gud mapalipay an mga tawo! Pariho hira hin magkauruyag, an iba waray sumayaw han nagplawta an iba nga kabataan o waray masubo han nagnguyngoy an iba. Pero nagsiring hi Jesus: “An kinaadman napapamatud-an nga matadong pinaagi han mga buhat hito.” Oo, an ebidensya—an mga buhat—nagpapakita nga sayop an mga akusasyon kanda Juan ngan Jesus.

Ginsaway ni Jesus an tulo nga syudad han Corasin, Betsaida, ngan Capernaum, diin ginbuhat niya an kadam-an han iya mga milagro. Siring ni Jesus nga kon ito nga mga milagro iya ginbuhat ha Tiro ngan Sidon nga mga syudad han Fenicia, nagbasol na unta hira pinaagi han pagsul-ot hin sako nga panapton ngan paglingkod ha mga agbon. Ha pagkondenar han Capernaum, nga posible amo an iya gin-uulian durante han iya ministeryo, nagsiring hiya: “Ha Adlaw han Paghukom, mas makuri an sirot ha iyo kay ha Sodoma.”

Katapos, dayag nga gindayaw ni Jesus an iya Amay ha langit. Naaghat hiya nga buhaton ito kay gintatago han Dios an birilhon nga mga kamatuoran tikang ha mga maaramon ngan edukado ngan iginpapahayag ito ha mapainubsanon, o ha kabataan, siring pa.

Ha kataposan, naghatag hi Jesus hin makaruruyag nga imbitasyon: “Kadi kamo ha akon, kamo ngatanan nga kinakapoy ngan binubug-atan, kay papapahuwayon ko kamo. Pas-ana an akon yugo ngan mahibaro kamo tikang ha akon, kay ako malumo ngan mapainubsanon an kasingkasing, ngan makakapahuway an iyo mga kalag. Kay an akon yugo masayon pas-anon ngan an akon iginpapapas-an ha iyo magaan.”

Paonan-o hi Jesus naghahatag hin pagpahuway? Pinaagi ha paghatag hin kagawasan tikang ha nag-uuripon nga mga tradisyon nga iginpapatuman han mga lider han relihiyon nga nakakapabug-at ha mga tawo, sugad han istrikto nga mga turumanon ha Sabbath. Naghatag liwat hiya hin paagi nga magin magaan an pinas-an han mga nabubug-atan ha pagdominar han mga may awtoridad ha politika, ngan hadton nabubug-atan han ira mga sala tungod han kakonsensya. Iginsumat niya ha mga nasasakit kon paonan-o mapapasaylo an ira mga sala ngan kon paonan-o magkakaada maopay nga relasyon ha Dios.

An yugo nga masayon pas-anon nga iginpapapas-an ni Jesus amo an bug-os nga pagdedikar ha Dios, an pag-alagad ha aton mapinairon ngan maloloy-on nga Amay ha langit. Ngan an magaan nga iginpapapas-an ni Jesus ha mga nadaop ha iya amo an pagsunod ha mga sugo han Dios nga mababasa ha Biblia basi magkaada kinabuhi. Diri gud mabug-at an pagsunod hito. Mateo 11:16-30; Lucas 1:15; 7:31-35; 1 Juan 5:3.

▪ Kay ano nga pariho hin kabataan an mapahitas-on ngan maruhaduhaon nga mga tawo ha henerasyon ni Jesus?

▪ Kay ano nga naaghat hi Jesus nga dayawon an iya Amay ha langit?

▪ Ano an nakakabug-at ha mga tawo? Paonan-o hira ginbuligan ni Jesus?