Kapitulo 75

An Nakakahatag hin Kalipay

DURANTE han ministeryo ni Jesus ha Galilea naghimo hiya hin mga milagro, ngan ginhihimo liwat niya ito yana ha Judea. Pananglitan, nagpagawas hiya hin demonyo nga nakapangula hin tawo. Nahipausa gud an mga tawo, pero an mga kritiko nagbangon hin pagriwa nga pariho han iginbangon ha Galilea. “Nagpapagawas hiya hin mga demonyo pinaagi kan Beelsebub, an magmarando han mga demonyo,” siring nira. Karuyag han iba nga maghatag hi Jesus hin dugang nga ebidensya kon hin-o gud hiya, ngan ginsulay nira hiya pinaagi ha pangaro hin tigaman tikang ha langit.

Maaram hi Jesus han ira ginhuhunahuna, salit ginbaton niya an mga kritiko ha Judea pariho han iya iginbaton ha mga kritiko ha Galilea. Nagsiring hiya nga an tagsa nga ginhadian nga nagkakabahinbahin mabubungkag. “Salit,” nagpakiana hiya, “kon hi Satanas mismo nababahin, paonan-o matindog an iya ginhadian?” Iginpapasabot niya nga namimeligro an mga kritiko han hiya nagsiring: “Kon nagpapagawas ako hin mga demonyo pinaagi han tudlo han Dios, waray kamo mahibaro nga an Ginhadian han Dios inabot na.”

An reaksyon han mga nakakita ha mga milagro ni Jesus sadang unta magin pariho ha reaksyon han mga nakakita ha milagro ni Moises mga siglo na an naglabay. “Amo ini an tudlo han Dios!” nahipapausa nga nagsiring hira hadto. “An tudlo han Dios” liwat an nagsurat han Napulo nga Sugo ha mga papan nga bato. Ngan “an tudlo han Dios”—an iya baraan nga espiritu, o aktibo nga pwersa—amo an binulig kan Jesus ha pagpagawas hin mga demonyo ngan pagtambal ha mga may sakit. Salit an Ginhadian han Dios inabot na gud ha mga kritiko, kay nakada mismo ha butnga nira hi Jesus, an ginpili nga Hadi han Ginhadian.

Katapos igin-ilustrar ni Jesus nga an iya abilidad ha pagpagawas hin mga demonyo nagpapamatuod nga mas gamhanan hiya kay ha kan Satanas, pariho ha mas makusog nga tawo nga naatake ngan nagpipirdi ha armado nga tawo nga nagbabantay han iya palasyo. Gin-utro liwat ni Jesus an ilustrasyon nga iya iginsaysay ha Galilea mahitungod ha maraot nga espiritu nga ginawas ha usa nga tawo. Han waray sudli han tawo hin mag-opay nga butang an nabakante han espiritu, binalik ito nga may upod nga pito pa, salit nagin mas maraot an kahimtang han tawo kay han siyahan.

Samtang namamati hito, usa nga babaye ha butnga han mga tawo an ginuliat: “Malipayon an babaye nga nanganak ngan nagpasuso ha imo!” Diri urusahon nga ito an iya ginsiring kay hingyap han tagsa nga Judio nga babaye nga magin nanay hin propeta ngan labi na han Mesias. Posible nga nahunahuna niya nga daku gud an kalipay ni Maria kay hiya an nanay ni Jesus.

Kondi gintadong dayon ni Jesus an panhunahuna han babaye mahitungod han naghahatag hin totoo nga kalipay. Nagsiring hiya: “Diri, lugod, Malipayon an mga namamati han pulong han Dios ngan nagbubuhat hito!” Diri niya iginpapasabot nga sadang tagan hin espesyal nga pagpasidungog an iya nanay nga hi Maria. Lugod, iginpapasabot niya nga an nakakahatag hin totoo nga kalipay amo an pagin matinumanon nga surugoon han Dios, diri an bisan ano nga relasyon han tawo o mga nahimo.

Sugad han ginbuhat ni Jesus ha Galilea, ginsaway liwat niya an mga taga-Judea tungod ha pangaro hin tigaman tikang ha langit. Nagsiring hiya nga waray tigaman nga ihahatag ha ira labot la han tigaman ni Jonas. Nagin tigaman hi Jonas tungod han tulo ka adlaw nga kahingadto niya ha tiyan han isda ngan han iya waray kahadlok nga pagsangyaw nga nagresulta ha pagbasol han mga taga-Ninibe. “Kondi kitaa,” siring ni Jesus, “labaw pa kan Jonas an aanhi!” Sugad man, an rayna han Sheba nahipausa gud ha kinaadman ni Solomon. “Pero kitaa,” nagsiring liwat hi Jesus, “labaw pa kan Solomon an aanhi!”

Nagsaysay hi Jesus nga kon may nagdadagkot hin lampara, diri niya ito iginbubutang ha tago nga lugar o gintatakloban hin basket kondi iginbubutang ito ha burutangan han lampara basi makita an kalamrag. Bangin iginpapasabot niya nga an pagtutdo ngan paghimo hin mga milagro ha atubangan han mga matig-a an ulo dida ha mga mamarati maipapariho ha pagtago han lamrag han lampara. An ira mga mata diri simple, o diri nakapokus, salit nababalewaray an katuyoan han iya mga milagro.

Nagpagawas pa la hi Jesus hin demonyo ngan nagtambal hin nangula. Napagios unta hito an mga tawo nga may simple, o nakapokus nga mga mata, nga dayawon iton urusahon nga buhat ngan ipasamwak an maopay nga sumat! Kondi tungod han mga kritiko, waray ito mahitabo. Salit nagsiring hiya: “Tungod hito, pagbantay nga an kalamrag nga aada ha imo diri kasisidman. Salit kon malamrag an imo bug-os nga lawas ngan waray gud masirom nga bahin hito, magigin sugad ito kalamrag han lampara nga naglalawag ha imo.” Lucas 11:14-36; Eksodo 8:18, 19; 31:18; Mateo 12:22, 28.

▪ Ano an nagin reaksyon han gintambal ni Jesus an tawo?

▪ Ano “an tudlo han Dios,” ngan paonan-o an Ginhadian han Dios inabot na ha mga namamati kan Jesus?

▪ Ano an naghahatag hin totoo nga kalipay?

▪ Paonan-o an usa nga tawo magkakaada simple nga mata?