Kapitulo 90

An Paglaom nga Pagkabanhaw

NAKAABOT na hi Jesus hirani ha Betania, usa nga baryo nga mga 3 ka kilometro an distansya ha Jerusalem. Pipira ka adlaw pa la an naglabay tikang nga namatay hi Lasaro ngan iginlubong. Duro pa an kasubo han iya kabugtoan nga hira Maria ngan Marta, ngan damu an kinadto ha ira balay basi liawon hira.

Hito nga takna, may nagsumat kan Marta nga tiabot na hi Jesus. Salit ginawas hiya ngan nagdagmit pagtapo kan Jesus, bangin waray niya masumati an iya bugto. Pagdaop ni Marta kan Jesus, ginsiring utro niya an posible nga ginyinakan nira nga magbugto han naglabay nga upat ka adlaw: “Ginoo, kon nakanhi ka la, waray unta kamatay an akon bugto.”

Pero nagpahayag hi Marta hin paglaom, kay bangin man la may mahihimo pa hi Jesus para ha iya bugto. “Maaram ako nga bisan yana anoman an imo aroon ha Dios, ihahatag niya ha imo,” siring niya.

“Mabubuhi an imo bugto,” nagsaad hi Jesus.

Kahuna ni Marta nga an ginsisiring ni Jesus amo an tidaraon nga pagkabanhaw dinhi ha tuna, nga ginpapamulat liwat ni Abraham ngan han iba pa nga surugoon han Dios. Salit nagsiring hiya: “Maaram ako nga mabubuhi hiya ha pamanhaw ha kataposan nga adlaw.”

Pero naghatag hi Jesus hin paglaom nga nakaliaw dayon, nagsiring hiya: “Ako an pagkabanhaw ngan an kinabuhi.” Ginpahinumdom niya hi Marta nga gintagan hiya han Dios hin gahum ha pagbanhaw. Nagsiring hiya: “An nagpapakita hin pagtoo ha akon, bisan kon mamatay hiya, mabubuhi; ngan an ngatanan nga buhi ngan nagpapakita hin pagtoo ha akon diri na gud mamamatay.”

Diri iginpapasabot ni Jesus kan Marta nga an mga matinumanon hito nga panahon diri na gud mamamatay. Karuyag la niya ipasabot nga an pagpakita hin pagtoo ha iya magriresulta hin kinabuhi nga waray kataposan. Ito nga kinabuhi mapapahimulosan han kadam-an nga tawo kon banhawon hira ha kataposan nga adlaw. Pero an iba nga matinumanon makakatalwas nga buhi kon matapos na ini nga sistema dinhi ha tuna, ngan literal nga matutuman ha ira an ginsiring ni Jesus. Diri gud hira mamamatay! Katapos hiton makalilipay nga ginsiring ni Jesus, ginpakianhan niya hi Marta, “Natoo ka ba hini?”

Binaton hiya: “Oo, Ginoo; natoo ako nga ikaw an Kristo nga Anak han Dios, an Usa nga makanhi ha kalibotan.”

Katapos nagdagmit hi Marta pag-uli ngan gintawag an iya bugto ngan ginhuringan: “Inabot na an Magturutdo ngan ginpapatawag ka niya.” Binaya dayon hi Maria ha balay. Pakakita han iba nga ginawas hiya, sinunod hira kay kahuna nira nga makadto hiya ha lubnganan.

Pagdaop ni Maria kan Jesus, nagtatangis nga hinapa hiya ha may tiilan. “Ginoo, kon nakanhi ka la, waray unta kamatay an akon bugto,” siring niya. Han nakita ni Jesus nga nagtitinangis hi Maria ngan an iya mga kaupod, nabantad gud an iya kasingkasing. Nagpakiana hi Jesus: “Diin niyo hiya iginlubong?”

Binaton hira: “Ginoo, kadi ngan kitaa.”

Nagtangis liwat hi Jesus, salit nagsiring an mga Judio: “Kitaa, pinalangga gud niya hi Lasaro!”

Nahinumdoman han iba nga han Piyesta han mga Tabernakulo pipira ka bulan pa la an naglabay, may gintambal hi Jesus nga batan-on nga lalaki nga buta tikang ha katawo, ngan nagpakiana hira: “Ini nga tawo nga nagpukrat han mga mata han buta, waray ba makapugong han kamatayon ni Lasaro?” Juan 5:21; 6:40; 9:1-7; 11:17-37.

▪ Kakan-o inabot hi Jesus hirani ha Betania, ngan ano an kahimtang didto?

▪ Kay ano nga natoo hi Marta nga may pagkabanhaw ha tidaraon?

▪ Ano an epekto kan Jesus han kamatay ni Lasaro?