An Pamilya han Bata nga hi Jesus
Kapitulo 9
An Pamilya han Bata nga hi Jesus
HAN nagtutubo hi Jesus ha Nazaret, ito nga syudad gutiay la ngan diri kilala. Nahimumutang ito ha bungturon nga distrito han Galilea, hirani ha maopay pagkit-on nga Walog han Jezreel.
Han gindara hi Jesus nira Jose ngan Maria ha Nazaret tikang ha Ehipto, han mga dos anyos hiya, matin-aw nga hiya pa la an anak ni Maria. Pero waray pag-iha, nagkaada hira mga anak nga hira Santiago, Jose, Simon, Judas, ngan anak nga kababayin-an. Salit hi Jesus nagkaada hin diri maminos ha unom nga kamanghoran.
May mga paryente liwat hi Jesus. Hinbaroan na naton an mahitungod han iya magurang nga patod nga hi Juan nga naukoy ha Judea, nga damu ka kilometro an kahirayo. Pero naukoy hirani ha Galilea hi Salome, nga bangin bugto ni Maria. Asawa hiya ni Sebedeo, amo nga patod ni Jesus an ira duha nga anak nga hira Santiago ngan Juan. Diri kita maaram kon nagkaurupod hira samtang nagtutubo, kondi nagin duok hira nga magsarangkay.
Kinahanglan magin maduruto hi Jose basi masuportahan an iya nagtitikadaku nga pamilya. Panday hiya. Ginpadaku niya hi Jesus sugad hin iya kalugaringon nga anak, salit gintawag hi Jesus nga “anak han panday.” Gintutdoan ni Jose hi Jesus ha pagpanday, ngan nahibaro gud hiya. Salit nagsiring an mga tawo mahitungod kan Jesus, “ini an panday.”
An kinabuhi han pamilya ni Jose nakasentro ha pagsingba kan Jehova nga Dios. Sugad nga pagsunod ha Balaud han Dios, gintutdoan nira Jose ngan Maria an ira mga anak han espirituwal nga mga butang ‘kon hira nalingkod ha ira balay, kon naglalakat ha dalan, kon nahigda, ngan kon nabuhát.’ May sinagoga ha Nazaret, ngan sigurado nga pirme igin-uupod ni Jose an iya pamilya basi magsingba didto. Pero waray ruhaduha nga an pinakamakalilipay ha ira amo an regular nga pagbiyahe ngadto ha templo ni Jehova ha Jerusalem. Mateo 13:55, 56; 27:56; Marcos 15:40; 6:3; Deuteronomio 6:6-9.
▪ Diri maminos hin pira an kamanghoran ni Jesus, ngan ano an ngaran han iba ha ira?
▪ Hin-o an tulo nga kilala nga patod ni Jesus?
▪ Ano an nagin trabaho ni Jesus, ngan kay ano?
▪ Ano an importante nga igintutdo ni Jose ha iya pamilya?
