Kapitulo 114

An Panihapon ha Memoryal

KATAPOS ni Jesus himsawan an mga apostol, ginkotar niya an Salmo 41:9 nga nasiring: “An kaupod ko ha pagkaon han tinapay nagtraydor ha akon.” Katapos, nasusubo hiya nga nag-esplikar: “Usa ha iyo an magtatraydor ha akon.”

Nabido an mga apostol ngan kada usa nagpakiana kan Jesus: “Ako ba?” Bisan hi Judas Iscariote nagpakiana liwat. Hi Juan, nga nahundarig sapit ni Jesus ha may lamesa, sinandig ha iya dughan ngan nagpakiana: “Ginoo, hin-o hiya?”

“Usa ha iyo nga 12 nga nadungan ha akon ha pagtunlob han iya kamot ha yahong,” binaton hi Jesus. “Oo, an Anak han tawo mabaya sugad la han nahisurat na mahitungod ha iya. Pero kairo hito nga tawo nga magtatraydor ha Anak han tawo! Mas maopay pa kon waray na la hiya matawo.” Katapos hito, gin-impluwensyahan na liwat ni Satanas hi Judas, ngan ginsalingabot an nagin maraot nga tendensya han iya kasingkasing. Hito nga gab-i, angayan gud an igintawag ni Jesus kan Judas nga “anak han kabungkagan.”

Nagsiring yana hi Jesus kan Judas: “Kon ano an imo ginbubuhat, durodagmita ito.” Diri maaram an mga apostol kon ano an iya karuyag sidngon. Tungod kay hi Judas an nakapot han kahon han kwarta, kahuna han iba nga ginsusugo hiya nga “pumalit han ira kinahanglanon ha piyesta,” o lumakat basi maghatag ha mga pobre.

Pagbaya ni Judas, gintikangan ni Jesus an bag-o nga selebrasyon, o paghinumdom, upod an magtinumanon nga apostol. Kinuha hiya hin tinapay, nag-ampo, gintipik-tipik ito, iginhatag ha mga disipulo ngan nagsiring: “Kuha kamo ngan kaona niyo.” Nagsaysay hiya: “Nagsisimbolo ini han akon lawas nga ihahatag para ha iyo. Padayon nga buhata niyo ini sugad nga hinumdoman ha akon.”

Han nakakaon na han tinapay an ngatanan, kinuha hiya hin kopa nga may bino, posible nga ito an ikaupat nga kopa nga gin-gamit para ha Paskua. Nag-ampo utro hiya, iginpasa ito, ginpainom hira, ngan nagsiring: “Ini nga kopa nagsisimbolo han bag-o nga kasabotan nga ginhimo pinaagi han akon dugo nga igpapaagay para ha iyo.”

Salit, ito an aktuwal nga memoryal han kamatayon ni Jesus. Kada tuig ha Nisan 14 kinahanglan isaurog ito, siring ni Jesus, sugad nga paghinumdom ha iya. An mga nagsasaurog mahinunumdom han ginbuhat niya ngan han iya Amay ha langit basi matalwas an katawohan ha sirot nga kamatayon. Para ha mga Judio nga nagin sumurunod han Kristo, ito nga selebrasyon an masaliwan ha Paskua.

An bag-o nga kasabotan, nga nagtikang pinaagi han pagpaagay han dugo ni Jesus, amo an iginsaliwan ha daan nga Balaud nga kasabotan. Hi Jesu-Kristo an tagapamutnga han duha nga partido—ha usa nga bahin, hi Jehova nga Dios, ngan ha luyo nga bahin, an 144,000 nga Kristiano nga igin-anak pinaagi han espiritu. Tungod han kasabotan mapapasaylo an mga sala, ngan maiestablisar liwat an langitnon nga nasud han mga hadi ngan saserdote. Mateo 26:21-29; Marcos 14:18-25; Lucas 22:19-23; Juan 13:18-30; 17:12; 1 Corinto 5:7.

▪ Ano nga tagna ha Biblia an ginkotar ni Jesus mahitungod han usa nga kaupod, ngan ano an iya iginsaysay mahitungod hito?

▪ Kay ano nga nabido gud an mga apostol, ngan ano an iginpakiana han kada usa ha ira?

▪ Ano an ginsiring ni Jesus kan Judas, pero ano an kahuna han iba nga mga apostol?

▪ Ano nga selebrasyon an gintikangan ni Jesus han binaya na hi Judas, ngan ano an katuyoan hito?

▪ Hin-o an mga bahin han bag-o nga kasabotan? Ano an kapulsanan hito?