Kapitulo 84

An Responsabilidad han Pagin Disipulo

PAGBAYA ni Jesus ha balay han prominente nga Pariseo, nga bangin membro han Sanhedrin, nagpadayon hiya pagkadto ha Jerusalem. Sinunod ha iya an damu nga tawo. Pero ano an ira motibo? Ano gud an ginkikinahanglan ha pagin iya totoo nga sumurunod?

Samtang nagbabaktas, inatubang hi Jesus ha mga tawo, ngan bangin waray hira makatoo han iya ginsiring: “Bisan hin-o nga nadaop ha akon ngan mas nahigugma ha iya tatay, nanay, asawa, mga anak, kabugtoan, ngan bisan ha iya kalugaringon nga kalag kay ha akon, diri hiya magigin akon disipulo.”

Ano an iya karuyag sidngon? Diri niya iginpapasabot nga diri hihigugmaon han iya mga sumurunod an ira kapamilya. Lugod, an ira gugma ha ira diri sadang magin labaw kay ha ira gugma ha Kristo.

Sugad man, diri maraot nga higugmaon han usa an “iya kalag,” o kinabuhi. Pero kinahanglan mas higugmaon han totoo nga disipulo hi Jesus kay ha iya kalugaringon. Salit ginpabug-atan ni Jesus nga seryoso nga responsabilidad an pagin iya disipulo. Diri kay basta la nga masulod hito nga diri anay ginhuhunahuna hin maopay.

An mga disipulo makakaeksperyensya hin kakurian ngan pagtimaraot, sugad han iya ginsiring: “Bisan hin-o nga diri nagpapas-an han iya pasakitan nga kahoy ngan diri nasunod ha akon, diri magigin akon disipulo.” Salit an totoo nga disipulo kinahanglan andam umatubang ha pagtamay pariho han gin-ilob ni Jesus, ngan kon kinahanglanon, andam pa ngani mamatay ha mga kamot han mga kaaway han Dios, sugad han hirani na mahitabo kan Jesus.

Kon sugad, an pagin disipulo kinahanglan turotimbangon hin maopay han mga tawo nga nasunod ha Kristo. Ginpabug-atan ito ni Jesus pinaagi hini nga ilustrasyon: “Pananglitan, hin-o ha iyo nga naruruyag pagtukod hin torre an diri anay malingkod ngan magkwenta han magagasto basi masiguro kon may ighuhuman hiya hito? Kay kon diri, bangin maglatag hiya han pundasyon pero diri makakahuman hito, ngan tatamayon hiya han ngatanan nga makakakita, nga masiring: ‘Ini nga tawo nagtikang pagtukod kondi waray pakahuman.’”

Salit iginpatin-aw ni Jesus ha mga tawo nga antes magin iya disipulo, sadang magin disidido hira ha pagtuman han ira mga responsabilidad, sugad la nga ginsisiguro anay han tawo nga karuyag magtukod hin torre kon may ighuhuman hiya hito antes hiya magtikang.

Naghatag hiya hin usa pa nga ilustrasyon: “Hin-o nga hadi nga makikig-away ha usa nga hadi an diri anay malingkod ngan mangaro hin sagdon kon hiya ba ngan an iya 10,000 nga kasundalohan makakaatubang ha naabot nga iya kaaway nga may 20,000 nga kasundalohan? Kon diri gud niya maaakos, magsusugo hiya hin mga embahador basi makigmurayaw samtang hirayo pa an kaaway.”

Basi pabug-atan an kahulogan han ilustrasyon, nagsiring hi Jesus: “Sugad man, diri magigin akon disipulo an bisan hin-o nga diri naruruyag pagbaya ha ngatanan nga iya panag-iya.” Ito an kinahanglan buhaton han mga nasunod ha Kristo, ngan han bisan hin-o nga nahibabaro mahitungod ha iya. Kinahanglan andam hira nga isakripisyo an ngatanan—an ira gintatag-iya, bisan an ira mismo kinabuhi—kon karuyag nira magin disipulo niya. Andam ka ba nga buhaton ito?

“Ha pagkamatuod, an asin maopay,” siring ni Jesus. Ha iya Sermon ha Bukid, nagsiring hiya nga an iya mga disipulo amo “an asin han tuna,” karuyag sidngon, an ira impluwensya sugad hin nakakapreserba ha mga tawo, sugad la nga nakakapreserba an literal nga asin. “Pero kon magtab-ang ito, paonan-o maibabalik an kaasin hito? Diri na ito angay isalakot ha tuna o ha abuno,” siring ni Jesus. “Iginlalabog ito han mga tawo ha gawas. An may mga talinga ha pagpamati, mamati.”

Salit iginpapasabot ni Jesus nga bisan an mga disipulo na niya hin pipira ka panahon, kinahanglan diri gud magluya ha ira determinasyon nga magpadayon. Kon magluya hira, magigin waray hira pulos, tatamayon han mga tawo hini nga kalibotan ngan mawawad-an hin pag-uyon han Dios, ha pagkamatuod, magpapakaalo ha Iya. Salit, pariho ha nagtab-ang ngan nahugawan nga asin, ilalabog hira ha gawas, oo, bubungkagon hira. Lucas 14:25-35; Mateo 5:13.

▪ Ano an iginpapasabot han “mas nahigugma” ha kapamilya ngan ha kalugaringon?

▪ Ano an duha nga ilustrasyon ni Jesus, ngan ano an kahulogan hito?

▪ Ano an karuyag sidngon han konklusyon ni Jesus mahitungod ha asin?