Kapitulo 15

An Siyahan nga Milagro ni Jesus

USA o duha ka adlaw pa la tikang nga nagin siyahan nga mga disipulo ni Jesus hira Andres, Pedro, Juan, Felipe, Natanael, ngan bangin pati hi Santiago. Tiuli na hira ha distrito han Galilea nga gintikangan nira ngatanan. Tipakadto hira ha Cana, an bungto ni Natanael, ha kabungtoran hirani ha Nazaret diin nagtubo hi Jesus. Gin-imbitar hira ha usa nga kasal ha Cana.

Nakadto liwat ha kasal an nanay ni Jesus. Sugad nga sangkay han pamilya han ginkakasal, posible nga binulig hi Maria ha pag-asikaso han damu nga bisita. Salit nakita dayon niya nga may kulang na ngan ginsumatan niya hi Jesus: “Waray na hira bino.”

Salit han baga hin nagsuhestyon hi Maria kan Jesus nga maghimo hin paagi kay nagkulang an bino, waray dayon sumugot hi Jesus. “Ano an labot naton hito?” siring niya. Sugad nga Hadi nga ginpili han Dios, diri hiya angay pangunahan han iya pamilya o kasangkayan han iya bubuhaton. Salit maaramon nga igintapod ito ni Maria ha iya anak, ngan ginsidngan na la an mga nagsiserbi: “Bisan ano nga iya isiring, buhata niyo.”

May unom nga tadyaw nga bato didto nga an kada usa sobra 10 ka galon an sulod. Ginsidngan ni Jesus an mga nagsiserbi: “Pun-a niyo hin tubig an mga tadyaw.” Ngan ira ito ginpuno tubtob ha ganggang. Katapos hi Jesus nagsiring: “Kuha kamo yana hin gutiay ngan dad-a ngadto ha direktor han kasal.”

Naruyagan gud han direktor an maopay nga klase han bino, pero diri hiya maaram nga ginhimo ito pinaagi hin milagro. Gintawag niya an kinasal nga lalaki, ngan ginsidngan: “An maopay nga bino amo an una nga iginsiserbi han bisan hin-o, ngan kon hubog na an mga bisita, an diri maopay nga klase na an iginsiserbi. Pero ikaw, yana mo la lugod igsiserbi an maopay nga bino.”

Ito an siyahan nga milagro ni Jesus, ngan han nakita ito han iya bag-o nga mga disipulo, naparig-on an ira pagtoo. Katapos, nagbiyahe hiya upod an iya nanay ngan kabugtoan ha iroy nga kalalakin-an pakadto ha Capernaum hirani ha Dagat han Galilea. Juan 2:1-12.

▪ Durante han ministeryo ni Jesus, kakan-o nahitabo an kasal ha Cana?

▪ Kay ano nga waray dayon sumugot hi Jesus ha suhestyon han iya nanay?

▪ Ano nga milagro an ginbuhat ni Jesus, ngan ano an epekto hito ha iba?