Kapitulo 14

An Siyahan nga mga Disipulo ni Jesus

KATAPOS hin 40 ka adlaw ha kamingawan, binalik hi Jesus kan Juan nga nagbawtismo ha iya. Han hirani na hi Jesus kan Juan ngan ha iya mga kaupod, posible nga gintudlok hiya ni Juan ngan nagsiring: “Kitaa, an Kordero han Dios nga nagkukuha han sala han kalibotan! Hiya an akon ginsisiring, An usa nga makanhi sunod ha akon, nahiuna ha akon, kay nahiuna hiya pag-eksister kay ha akon.” Bisan kon hi Juan magurang ha iya patod nga hi Jesus, maaram hiya nga antes pa hiya natawo, buhi na hi Jesus ha langit sugad nga espiritu nga persona.

Pero han naglabay nga pipira ka semana, han nagpabawtismo hi Jesus, baga hin diri sigurado hi Juan nga hi Jesus an magigin Mesias. “Bisan ako waray makakilala ha iya,” siring ni Juan, “pero kinanhi ako ha pagbawtismo ha tubig basi makilala hiya han Israel.”

Iginsaysay ni Juan ha mga namamati ha iya kon ano an nahitabo han ginbawtismohan niya hi Jesus: “Nakita ko an espiritu nga nalusad sugad hin sarapati tikang ha langit, ngan nagpabilin ito dida ha iya. Bisan ako waray makakilala ha iya, pero an Dios nga nagsugo ha akon nga magbawtismo ha tubig nagsiring ha akon, ‘Kon makita mo an espiritu nga nalusad ngan nagpapabilin ha iya, ini hiya an nagbabawtismo pinaagi han baraan nga espiritu.’ Nakita ko ito, ngan akon ginpamatud-an nga hiya an Anak han Dios.”

Kinabuwasan, nagtinindog hi Juan kaupod an duha han iya mga disipulo. Han tiabot hi Jesus, nagsiring na liwat hi Juan: “Kitaa, an Kordero han Dios!” Tungod hito, sinunod kan Jesus inin duha nga disipulo ni Juan nga Parabaptis. An usa hi Andres, ngan an usa pa amo mismo an nagsurat hini nga asoy, nga Juan liwat an ngaran. May mga indikasyon nga ini nga Juan patod liwat ni Jesus, kay posible nga anak hiya ni Salome nga bugto ni Maria.

Han liningi hi Jesus ngan nakita nga nasunod ha iya hira Andres ngan Juan, nagpakiana hiya: “Ano an iyo tuyo?”

Nagsiring hira: “Rabbi, diin ka naukoy?”

“Kadi, ipapakita ko ha iyo,” binaton hi Jesus.

Mga alas-4 adto ha kulop, ngan hira Andres ngan Juan nag-inupod kan Jesus hito nga adlaw. Katapos, ha duro nga kalipay ni Andres, ginbiling dayon niya hi Pedro nga iya bugto ngan ginsumatan: “Hin-agian namon an Mesias.” Ngan igin-upod niya hi Pedro ngadto kan Jesus. Bangin hito nga panahon, ginbiling liwat ni Juan an iya bugto nga hi Santiago ngan igin-upod ngadto kan Jesus; pero ini nga detalye waray na isurat ni Juan ha Ebanghelyo.

Kinabuwasan, nakita ni Jesus hi Felipe nga taga-Betsaida. Taga-didto liwat hito nga syudad hira Andres ngan Pedro. Hi Jesus nagsiring kan Felipe: “Sunod ha akon.”

Katapos nakita ni Felipe hi Natanael, nga gintatawag liwat nga Bartolome, ngan iya ginsumatan: “Hin-agian namon an gin-uunabi ha mga sinurat ni Moises, ha Balaud, ngan ha mga sinurat han mga Propeta, nga amo hi Jesus, an anak ni Jose nga taga-Nazaret.” Nagruhaduha hi Natanael: “May maopay ba nga magtitikang ha Nazaret?”

“Kadi ngan imo makikita,” gin-aghat hiya ni Felipe. Han tidaop hira kan Jesus, nagsiring hi Jesus mahitungod kan Natanael: “Kitaa, an usa nga Israelita nga diri gud naglilimbong.”

“Paonan-o mo ako nakilala?” nagpakiana hi Natanael.

Binaton hi Jesus: “Antes ka tawagon ni Felipe, samtang nakadto ka ha ilarom han kahoy nga igera, nakita ko ikaw.”

Nahipausa gud hi Natanael. Nagsiring hiya: “Rabbi [nangangahulogan, Magturutdo], ikaw an Anak han Dios, ikaw an Hadi han Israel.”

“Natoo ka ba ha akon tungod la kay nagsumat ako ha imo nga nakita ko ikaw ha ilarom han kahoy nga igera?” nagpakiana hi Jesus. “Makakakita ka hin mga butang nga mas urusahon pa hini.” Katapos nagsaad hiya: “Ha pagkamatuod susumatan ko kamo, Makikita niyo nga abrido an langit ngan an mga anghel han Dios nasaka ngadto ngan nalusad ngada ha Anak han tawo.”

Waray pag-iha, hi Jesus ngan an iya bag-o nga mga disipulo binaya ha Walog han Jordan ngan kinadto ha Galilea. Juan 1:29-51.

▪ Hin-o an siyahan nga mga disipulo ni Jesus?

▪ Paonan-o iginpakilala kan Jesus hi Pedro, sugad man hi Santiago?

▪ Ano an nakakombinse kan Natanael nga hi Jesus an Anak han Dios?