Kapitulo 47

An mga Luha Nasaliwnan hin Duro nga Kalipay

HAN nakita ni Jairo nga natambal an babaye nga gindidinugoan, sigurado nga mas sinarig hiya ha gahum ni Jesus ha pagbuhat hin milagro. Temprano hito nga adlaw, ginhangyo ni Jairo hi Jesus nga umupod ha iya basi buligan an iya 12 anyos nga anak nga daragita nga hirani na mamatay. Pero yana, nahitabo an iya nahahadlokan. Samtang nakikiistorya hi Jesus ha babaye, may mga lalaki nga inabot ngan naghuring kan Jairo: “An imo anak patay na! Kay ano nga didisturbuhon mo pa an Magturutdo?”

Makasurubo gud ito nga sumat! Hunahunaa la: Ini nga tawo, nga ginrirespeto ha ira komunidad, waray gud yana nahihimo ha kamatay han iya anak. Pero hinbatian ni Jesus an ira iristorya. Salit liningi hiya kan Jairo ngan ginpasarig: “Ayaw kabaraka, tumoo ka la.”

Inupod hi Jesus ngadto ha balay hinin masurub-on gud nga tawo. Han inabot hira, nakita nira an damu nga tawo nga nananangis ngan nagngunguyngoy, ngan ginpupukpok an dughan ha kasubo. Han sinulod hi Jesus, nagpakiana hiya: “Kay ano nga nalilisang kamo ngan nananangis? Waray mamatay an bata, nakaturog la hiya.”

Han hinbatian nira ito, nakakatamay nga gintinawaan nira hi Jesus kay maaram hira nga patay na an daragita. Pero nagsiring hi Jesus nga nakaturog la hiya. Pinaagi han iginhatag nga gahum han Dios, ipapakita niya nga an nagkamatay babanhawon hin sugad la kasayon ha pagpukaw han nakaturog hin hilarom.

Ginpagawas ni Jesus an ngatanan labot la kanda Pedro, Santiago, Juan, ngan an mga kag-anak han daragita. Hira nga lima igin-upod ni Jesus ha ginhihigdaan han daragita. Ginkaptan ni Jesus an kamot han bata, ngan nagsiring: “Talitha cumi,” nga nangangahulogan: “Daragita, nasiring ako ha imo, ‘Buhát!’” Binuhát dayon hiya ngan naglakat! Haros diri makontrol han iya mga kag-anak an ira emosyon tungod han duro nga kalipay.

Nagsugo hi Jesus nga tagan hin pagkaon an bata. Katapos gintugon niya hi Jairo ngan an iya asawa nga diri isumat ha bisan hin-o an nahitabo. Pero bisan pa hito, nahibantog ito ha bug-os nga rehiyon. Ini an ikaduha nga ginbanhaw ni Jesus. Mateo 9:18-26; Marcos 5:35-43; Lucas 8:41-56.

▪ Ano an iginsumat kan Jairo, ngan paonan-o hiya ginpasarig ni Jesus?

▪ Ano an kahimtang han inabot hira ha balay ni Jairo?

▪ Kay ano nga nagsiring hi Jesus nga an patay nga bata nakaturog la?

▪ Hin-o an lima nga kaupod ni Jesus nga nakakita ha pagbanhaw?