Kapitulo 56

Ano an Nakakahugaw ha Tawo?

NAGTIKADURO an pagkontra kan Jesus. Labot la nga damu han iya mga disipulo an binaya, karuyag liwat hiya patayon han mga Judio ha Judea sugad han ira ginbuhat han nakadto hiya ha Jerusalem han Paskua han 31 C.E.

Paskua na han 32 C.E. Posible nga tinambong hiya ha Paskua ha Jerusalem sugad nga pagsunod ha sugo han Dios. Pero nag-ikmat gud hiya kay namimeligro an iya kinabuhi. Katapos binalik hiya ha Galilea.

Posible nga hi Jesus nakadto ha Capernaum han dinaop ha iya an mga Pariseo ngan mga eskriba nga tikang ha Jerusalem. Namimiling hira hin basihan basi maakusaran hiya hin pagtalapas ha relihiyon. “Kay ano nga diri ginsusunod han imo mga disipulo an tradisyon han mga tawo ha kadaan nga panahon?” nagpakiana hira. “Pananglitan, diri hira nanhuhunaw antes kumaon.” Diri ito upod ha sugo han Dios, pero para ha mga Pariseo seryoso nga sala an diri pagsunod hito nga rituwal, upod na an paghunaw tubtob ha siko.

Imbes nga batunon an ira akusasyon, ginpabug-atan ni Jesus an ira maraot ngan tinuyo nga pagtalapas ha Balaud han Dios. “Kay ano nga diri liwat niyo ginsusunod an sugo han Dios tungod han iyo tradisyon?” nagpakiana hiya. “Pananglitan, an Dios nagsiring, ‘Pasidunggi an imo tatay ngan an imo nanay,’ ngan ‘An nagyayakan hin maraot ha iya tatay o nanay, papatayon.’ Pero nasiring kamo, ‘An bisan hin-o nga nasiring ha iya tatay o nanay: “Bisan ano nga gintatag-iya ko nga posible mapahimulsan mo iginhalad ko na ha Dios sugad nga regalo,” diri na niya kinahanglan pasidunggan an iya tatay.’”

Igintututdo han mga Pariseo nga an kwarta, panag-iya, o bisan ano nga iginhalad ha Dios sugad nga regalo para na ha templo ngan diri na puydi gamiton ha iba nga katuyoan. Pero ha pagkamatuod, an iginhalad nga regalo gintitipigan han naghalad. Salit kon magsiring an anak nga an iya kwarta o propyedad “corban” na—iginhalad na ha Dios o ha templo sugad nga regalo—hito nga paagi, nalikay hiya ha responsabilidad nga buligan an iya lagas nga mga kag-anak, nga bangin nagkukuri gud.

Husto la nga masina hi Jesus ha pagbaliko han mga Pariseo ha Balaud han Dios, salit nagsiring hiya: “Ginbalewaray niyo an pulong han Dios tungod han iyo tradisyon. Mga hipokrito, husto gud an igintagna ni Isaias mahitungod ha iyo han hiya nagsiring: ‘Ini nga mga tawo nagpapasidungog ha akon pinaagi han ira mga im-im, pero an ira kasingkasing hirayo gud ha akon. Waray pulos an ira padayon nga pagsingba ha akon, kay ira igintututdo an mga sugo han mga tawo sugad nga mga doktrina.’”

Bangin inatras an damu nga tawo basi makagpakiana an mga Pariseo kan Jesus. Han waray maisiring an mga Pariseo ha pagsaway ni Jesus ha ira, iya ginpadaop an mga tawo. “Pamati kamo ha akon,” nagsiring hiya, “ngan sabota niyo an kahulogan hini. An nakakahugaw ha tawo diri an nasulod ha iya baba, kondi an nagawas tikang hito.”

Katapos, pagsulod niya ngan han mga disipulo ha balay, nagpakiana hira: “Maaram ka ba nga nasina an mga Pariseo ha imo ginsiring?”

Binaton hi Jesus: “An tagsa nga tanom nga waray igtanom han akon langitnon nga Amay, gagabuton. Pabay-i hira. Mga buta hira nga paratugway. Kon buta an nagtutugway ha igkasi-buta, hira nga duha mahuhulog ha buho.”

Baga hin nahipausa hi Jesus han nagpakiana hi Pedro para ha mga disipulo, basi klaruhon kon ano an nakakahugaw ha tawo. “Waray ba liwat kamo makasabot?” siring ni Jesus. “Diri ba kamo maaram nga an ngatanan nga nasulod ha baba naagi ha tiyan ngan nagawas ha lawas? Pero an nagawas ha baba nagtitikang ha kasingkasing, ngan ito an nakakahugaw ha tawo. Pananglitan, nagtitikang ha kasingkasing an maraot nga pangatadongan, pagpatay, pag-adulteryo, imoralidad, pangawat, pagtestigo hin buwa, ngan pagpasipara. Ini nga mga buhat an nakakahugaw ha tawo, pero an diri paghunaw antes kumaon diri nakakahugaw ha iya.”

Waray igdiri ni Jesus an normal nga paglimpyo. Diri niya iginpapasabot nga diri na kinahanglan maghunaw antes mag-andam hin pagkaon o kumaon. Lugod, ginkukondenar niya an pagin hipokrito han mga lider han relihiyon nga tuso nga nalikay ha pagsunod ha matadong nga mga balaud han Dios pinaagi ha pagpirit nga sundon an mga tradisyon nga diri uyon ha kasuratan. Oo, an magraot nga buhat an nakakahugaw ha tawo, ngan iginpakita ni Jesus nga nagtitikang ito ha kasingkasing. Juan 7:1; Deuteronomio 16:16; Mateo 15:1-20; Marcos 7:1-23; Eksodo 20:12; 21:17; Isaias 29:13.

▪ Ano nga pagkontra an gin-atubang ni Jesus?

▪ Ano an akusasyon han mga Pariseo? Sumala kan Jesus, paonan-o nira tinuyo nga gintalapas an Balaud han Dios?

▪ Ano an ginsiring ni Jesus nga nakakahugaw ha tawo?