Kapitulo 32

Ano an Uyon ha Balaud kon Sabbath?

HAN Sabbath binisita hi Jesus ha sinagoga hirani ha Dagat han Galilea. May tawo didto nga uga an too nga kamot. Nagbibinantay an mga eskriba ngan mga Pariseo kon tatambalon hiya ni Jesus. Nagpakiana hira: “Uyon ba ha Balaud an pagtambal ha adlaw han Sabbath?”

Natoo an Judio nga mga lider han relihiyon nga uyon ha balaud an pagtambal ha adlaw han Sabbath kon namimeligro la an kinabuhi. Pananglitan, igintututdo nira nga kon Sabbath, diri uyon ha balaud nga maghilot ha napiang o magbendahe ha nalisa. Salit nagpakiana an mga eskriba ngan mga Pariseo basi may maiakusar kan Jesus.

Kondi maaram hiya han ira pangatadongan. Nakita liwat niya nga panatiko hira ngan diri uyon ha Kasuratan an ira ideya kon ano an diri puydi buhaton kon Sabbath. Salit nagtikang an makapainteres nga komprontasyon han ginsidngan niya an tawo nga uga an kamot: “Buhát ngan kadto ha butnga.”

Katapos nagsiring hiya ha mga eskriba ngan mga Pariseo: “Hin-o ha iyo an may karnero nga kon mahulog ito ha buho ha adlaw han Sabbath, pababay-an la niya ngan diri kukuhaon?” Tungod kay may puhunan an pag-ataman hin karnero, diri nira ito pababay-an nga mabuwasan ha buho, kay bangin magkasakit ito ngan malugi hira. Labot pa, an Kasuratan nasiring: ‘An tawo nga matadong nagtatagad han kinabuhi han iya inataman nga hayop.’

Ha pagtanding, hi Jesus nagsiring: “Mas importante gud an tawo kay ha karnero! Salit uyon ha balaud an pagbuhat hin maopay ha adlaw han Sabbath.” An mga lider han relihiyon waray makabaton hiton lohikal ngan mapinairon nga pangatadongan, salit waray na hira magyakan.

Tungod kay nasusubo gud hi Jesus ha katig-a han ira kasingkasing, nasisina nga iya ginkinita hira, katapos ginsidngan niya an tawo: “Unata an imo kamot.” Gin-unat niya ito ngan nag-opay.

Imbes nga malipay kay nag-opay an kamot han tawo, an mga Pariseo nagkagawas ngan nakigsarabot dayon ha mga membro han partido ni Herodes nga patayon hi Jesus. Kaupod hito nga partido ha politika an mga membro han relihiyon han mga Saduseo. Ito nga partido ha politika ngan an mga Pariseo dayag nga magkaaway, pero nagkaurosa gud hira ha pagkontra kan Jesus. Mateo 12:9-14; Marcos 3:1-6; Lucas 6:6-11; Proberbios 12:10; Eksodo 20:8-10.

▪ Ano an kahimtang han nahitabo an makapainteres nga komprontasyon ni Jesus ngan han Judio nga mga lider han relihiyon?

▪ Ano an gintotoohan han Judio nga mga lider mahitungod han pagtambal kon Sabbath?

▪ Ano nga ilustrasyon an gin-gamit ni Jesus basi ipakita nga sayop an ira gintotoohan?