Kapitulo 48

Binaya ha Balay ni Jairo Ngan Binalik ha Nazaret

DAMU an ginbuhat ni Jesus ha bug-os nga adlaw—nagbiyahe ha dagat tikang ha Decapolis, nagtambal ha babaye nga gindidinugoan, ngan nagbanhaw han anak ni Jairo. Pero may iba pa hiya nga ginbuhat. Pagbaya niya ha balay ni Jairo, duha nga buta nga lalaki an nagsinunod nga nagsininggit: “Malooy ka ha amon, Anak ni David.”

Han gintawag nira hi Jesus nga “Anak ni David,” iginpapakita nira nga natoo hira nga hiya an manurunod ha trono ni David, ngan hiya an iginsaad nga Mesias. Pero baga hin ginbalewaray niya an ira pangaro hin bulig, siguro basi sarihan an ira determinasyon. Kondi waray hira umundang. Nagsinunod hira ngadto ha iya inuukyan, ngan pagsulod niya ha balay, sinulod liwat hira.

Ginpakianhan hira ni Jesus: “Natoo ba kamo nga mahihimo ko ini?”

“Oo, Ginoo,” may pagsarig nga binaton hira.

Salit ginkaptan ni Jesus an ira mga mata ngan nagsiring: “Mahitabo unta ito ha iyo uyon ha iyo pagtoo.” Ngan nakakita dayon hira! Katapos gintugon hira: “Ayaw gud niyo ini igsumat ha bisan hin-o.” Pero tungod ha kalipay, waray hira mamati ha sugo ni Jesus ngan nagpinanumat ha kahirani nga mga lugar.

Pagbaya han duha nga lalaki, gindara han mga tawo kan Jesus an lalaki nga diri nakakayakan kay ginsaniban hin demonyo. Ginpagawas niya an demonyo, ngan nakayakan dayon an lalaki. Salit nahipausa gud an mga tawo ngan nagsiring: “Waray pa gud nahitabo nga sugad hini ha Israel.”

May mga Pariseo liwat nga nakadto. Diri hira makakanigar han mga milagro, pero tungod kay maraot hira ngan waray pagtoo, gin-utro nira an ira akusasyon mahitungod han gintitikangan han gahum ni Jesus ha pagbuhat hin mga milagro. Nagsiring hira: “Nagpapagawas hiya hin mga demonyo pinaagi han magmarando han mga demonyo.”

Waray pag-iha katapos hini, binalik hi Jesus ha iya bungto ha Nazaret upod an mga disipulo. Ha naglabay nga tuig, kinadto hiya ha sinagoga ngan nagtutdo didto. Bisan kon an mga tawo nahipausa gud ha iya makaruruyag nga mga pulong, ha urhi nasina hira ha iya igintutdo ngan karuyag nga patayon hiya. Pero yana, tungod ha kalooy, kinadto utro hi Jesus basi buligan an iya mga kahimungto.

Han nakadto hi Jesus ha iba nga lugar, nagtirirok an damu nga tawo ha iya, pero dinhi waray ito mahitabo. Salit han Sabbath, kinadto hiya ha sinagoga basi magtutdo. Nahipausa gud an kadam-an nga namamati. “Diin tikang an kinaadman hini nga tawo ngan ini nga gamhanan nga mga buhat?” nagpakiana hira. “Diri ba ini an anak han panday? Diri ba hi Maria an iya nanay, ngan an iya kabugtoan hira Santiago, Jose, Simon ngan Judas? Ngan an iya kabugtoan nga kababayin-an, diri ba hira ngatanan naukoy dinhi kaupod naton? Kon sugad, diin nakuha hini nga tawo an ngatanan nga iya abilidad?”

‘Hi Jesus taga-dinhi pariho la ha aton,’ nangatadongan hira. ‘Nakita naton an iya pagtubo, ngan kilala naton an iya pamilya. Paonan-o nga hiya an Mesias?’ Salit bisan pa han ngatanan nga ebidensya—an iya daku nga kinaadman ngan damu nga milagro—iginsalikway nira hiya. Tungod kay kilala gud nira hi Jesus, bisan an iya mga paryente nahipakdol ha iya. Salit nagsiring hiya: “An usa nga propeta ginpapasidunggan ha bisan diin, labot la ha iya lugar ngan han iya mga paryente ngan han iya panimalay.”

Nahipausa gud hi Jesus han ira kawaray pagtoo. Salit waray hiya maghimo didto hin mga milagro gawas la han pagkapot ha pipira nga may sakit ngan pagtambal ha ira. Mateo 9:27-34; 13:54-58; Marcos 6:1-6; Isaias 9:7.

▪ Han gintawag hi Jesus nga “Anak ni David,” ano an iginpapakita nga gintotoohan han mga buta nga lalaki?

▪ Para ha mga Pariseo, diin nagtikang an gahum ni Jesus ha pagbuhat hin mga milagro?

▪ Kay ano nga tungod ha kalooy an pagbalik ni Jesus ha Nazaret?

▪ Paonan-o gintratar hi Jesus ha Nazaret, ngan kay ano?