Kapitulo 128

Buhi na hi Jesus!

HAN nakita han kababayin-an nga waray na sulod an ginlubngan kan Jesus, dinalagan hi Maria Magdalena basi sumatan hira Pedro ngan Juan. Pero an iba ha ira nagpabilin ha lubnganan. Waray pag-iha, may anghel nga nagpakita ngan ginpasulod hira.

Didto usa pa nga anghel an ira nakita, ngan an usa han mga anghel nagsiring: “Ayaw kamo kahadlok, maaram ako nga ginbibiling niyo hi Jesus nga iginraysang ha kahoy. Waray na hiya dinhi kay ginbanhaw na hiya, sugad han iya ginsiring. Kadi, kitaa niyo an ginlubngan ha iya. Kadto kamo dayon ha iya mga disipulo ngan sumati hira nga ginbanhaw na hiya.” Salit dinalagan dayon hira nga nahahadlok ngan duro an kalipay.

Hito nga takna, nakit-an na ni Maria hira Pedro ngan Juan, ngan ginsumatan hira: “Ginkuha nira an Ginoo ha lubnganan, ngan diri kami maaram kon diin hiya iginbutang.” Salit dinalagan dayon an duha nga apostol. Mas malaksi dumalagan hi Juan, siguro kay burobata hiya, salit hiya an una nga inabot ha lubnganan. Pero waray na tawo didto kay binaya na an kababayin-an. Paghiling ni Juan ha sulod han lubnganan, nakita niya an mga tela, pero waray hiya sumulod.

Han inabot hi Pedro, sinulod dayon hiya. Nakita niya didto an mga bendahe nga tela, ngan an iginputos ha ulo ni Jesus nga nakalukot ha piliw. Yana, sinulod liwat hi Juan ha lubnganan, ngan tinoo hiya ha iginsumat ni Maria. Pero waray pa masabti nira Pedro ngan Juan nga ginbanhaw na hi Jesus, bisan kon hadto agsob Niya sumatan hira mahitungod hito. Nawuwurok nga inuli hira nga duha ha balay, pero hi Maria binalik ha lubnganan ngan nagpabilin didto.

Hito nga takna, an iba nga kababayin-an nagdadagmit basi sumatan an mga disipulo nga ginbanhaw na hi Jesus, sugad han iginsugo ha ira han mga anghel. Samtang nagdidinalagan hira tubtob ha ira mahihimo, gintapo hira ni Jesus ngan nagsiring: “Maopay nga adlaw!” Linuhod hira ha iya tiilan ngan yinukbo. Katapos hi Jesus nagsiring: “Ayaw kamo kahadlok! Kadto kamo ha akon kabugtoan, ngan sumati hira basi kumadto ha Galilea, ngan makikita nira ako didto.”

Diri pa la maiha, han naglinog ngan nagpakita an mga anghel, nahipausa gud an bantay nga mga sundalo ngan waray hira pakakiwa. Han naulian hira, kinadto dayon hira ha syudad ngan iginsumat ha punoan nga mga saserdote an nahitabo. Katapos konsultahon han mga saserdote an “katigurangan” han mga Judio, gindesisyonan nira nga diri ito ipanumat, salit ginsuholan nira an mga sundalo ngan ginsugo: “Ipanumat niyo, ‘An mga disipulo ni Jesus kinadto han gab-i ngan ginkawat an iya patay nga lawas samtang nangangaturog kami.’”

Mahimo sirotan hin kamatayon an Romano nga kasundalohan kon kumaturog hira samtang nagbabantay, salit nagsaad an mga saserdote: “Kon makabati hini an gobernador [nga nangaturog kamo], kukombinsihon namon hiya ngan ayaw kamo kabaraka.” Tungod kay daku an suhol, gintuman nira an iginsugo ha ira. Salit, an buwa nga sumat nga ginkawat an lawas ni Jesus nahibantog ha mga Judio.

Hi Maria Magdalena, nga nagpabilin ha lubnganan, nasusubo gud. Hain daw la hi Jesus? Han naghiling hiya ha sulod han lubnganan, nakakita hiya hin duha nga anghel nga nakabusag, nga nagpakita utro! An usa nalingkod ha may ulohan ngan an usa ha may tiilan han ginbutangan han lawas ni Jesus. “Babaye, kay ano nga nagtitinangis ka?” nagpakiana hira.

“Ginkuha nira an akon Ginoo,” binaton hi Maria, “ngan diri ako maaram kon diin nira hiya iginbutang.” Katapos liningi hiya ngan nakita niya an usa nga nag-utro han pakiana: “Babaye, kay ano nga nagtitinangis ka?” Ngan nagpakiana pa: “Hin-o an imo ginbibiling?”

Kahuna ni Maria nga hiya an hardinero ha lubnganan, salit nagsiring hiya: “Mano, kon ikaw an nagdara ha iya, sumati ako kon diin mo hiya iginbutang kay kukuhaon ko hiya.”

“Maria!” nagsiring hiya. Nakilala dayon ni Maria nga hi Jesus ito kay pamilyar an iya paagi han pakiistorya. Nagsiring hi Maria: “Rabboni!” (nangangahulogan, “Magturutdo!”) Diri niya mapugngan an iya kalipay, salit ginkaptan niya hi Jesus. Pero ginsidngan hiya: “Ayaw ako pagkapti, kay waray pa ako sumaka ngadto ha akon Amay. Kadto lugod ha akon kabugtoan ngan sumati hira, ‘Masaka ako ngadto ha akon Amay ngan ha iyo Amay, ha akon Dios ngan ha iyo Dios.’”

Dinalagan hi Maria ngadto ha ginkakatirokan han mga apostol ngan mga disipulo. Labot han iginsumat na han iba nga kababayin-an nga nakita nira nga nabanhaw na hi Jesus, iginsumat liwat niya an iya nakita. Kondi, ini nga kalalakin-an nga waray tumoo ha nauna nga kababayin-an, waray liwat tumoo kan Maria. Mateo 28:3-15; Marcos 16:5-8; Lucas 24:4-12; Juan 20:2-18.

▪ Han nakita han kababayin-an nga waray na sulod an lubnganan, ano an ginbuhat ni Maria Magdalena, ngan ano an naeksperyensyahan han iba nga kababayin-an?

▪ Ano an reaksyon nira Pedro ngan Juan han hinbaroan nira nga waray na sulod an lubnganan?

▪ Hin-o an nakatapo han iba nga kababayin-an samtang tikadto hira ha mga disipulo basi isumat nga nabanhaw na hi Jesus?

▪ Ano an nahitabo ha bantay nga mga sundalo? Ano an ginbuhat han mga saserdote mahitungod han ira iginsumat?

▪ Ano an nahitabo han nag-uusahan la hi Maria Magdalena ha lubnganan? Ano an reaksyon han mga disipulo ha iginsumat han kababayin-an?