Kapitulo 4

Burod Pero Waray Bana

TULO ka bulan na nga burod hi Maria. Mahinunumdoman mo nga han nagtitikang pa la hiya magburod binisita hiya kan Elizabeth, pero yana inuli na hiya ha Nazaret. Diri mag-iiha, mahibabaroan na han mga tawo ha ira bungto an iya kahimtang. Makuri gud an iya sitwasyon!

Mas nagkuri pa gud an sitwasyon kay hi Maria hirani na kaslon ha panday nga hi Jose. Maaram hiya nga ha Balaud han Dios ha Israel, an babaye nga nakigsabot na ha pagpakasal pero tinuyo nga nakighilawas ha iba nga lalaki, babatuhon tubtob nga mamatay. Paonan-o niya isasaysay kan Jose an iya pagburod?

Tungod kay tulo ka bulan nga waray hi Maria, sigurado nga karuyag na gud ni Jose nga makita hiya. Han pagkita nira, posible nga ginsumatan hiya ni Maria han nahitabo. Bangin ginhimo gud niya an ngatanan basi isaysay nga burod hiya pinaagi han baraan nga espiritu han Dios. Pero syempre, diri gud makatoo hito hi Jose.

Maaram hi Jose nga maopay an reputasyon ni Maria. Ngan sigurado nga hinigugma gud hiya ni Jose. Kondi bisan pa han iginsaysay ni Maria, baga hin naburodan gud hiya hin iba nga lalaki. Bisan pa hito, diri karuyag ni Jose nga batuhon hi Maria tubtob nga mamatay o maalohan ha publiko. Salit nagplano hiya nga makigdiborsyo ha iya hin sekreto. Hito nga panahon, an mga may kasabotan ha pagpakasal ginhuhunahuna sugad nga kasal na, ngan kinahanglan an diborsyo basi tapuson an ginkasabotan.

Katapos, samtang ginhuhunahuna ito, nahingaturog hi Jose. Nagpakita ha iya ha inop an anghel ni Jehova nga nasiring: “Ayaw kahadlok nga dad-on ha imo balay hi Maria nga imo asawa, kay burod hiya pinaagi han baraan nga espiritu. Manganganak hiya hin lalaki ngan pagngangaranan mo hin Jesus, kay hiya an magtatalwas han iya katawohan tikang ha ira mga sala.”

Pagmata ni Jose, nagpasalamat gud hiya! Ginbuhat dayon niya an iginsugo han anghel—gindara niya hi Maria ha iya balay. Han nakita han publiko ito nga iya ginbuhat, sugad ito hin seremonya ha kasal nga nagpapasabot nga kasal na hira. Pero waray makighilawas hi Jose kan Maria samtang burod kan Jesus.

Kitaa! Hirani na manganak hi Maria, pero ginpapasakay hiya ni Jose ha asno. Makain hira, ngan kay ano nga magbibiyahe hira nga hirani na manganak hi Maria? Lucas 1:39-41, 56; Mateo 1:18-25; Deuteronomio 22:23, 24.

▪ Ano an nahunahuna ni Jose han nahibaro hiya nga burod hi Maria, ngan kay ano?

▪ Kay ano nga makikigdiborsyo hi Jose kan Maria nga diri pa man hira kasal?

▪ Ano an ginbuhat nira Jose ngan Maria nga nakita han publiko nga maipapariho ha seremonya ha kasal?