Kapitulo 36

Daku nga Pagtoo han Opisyal han Kasundalohan

HAN iginpahayag ni Jesus an iya Sermon ha Bukid, haros katunga na adto han iya ministeryo. Kon sugad, usa ka tuig ngan siyam ka bulan na la o sobra pa matatapos na an iya buruhaton dinhi ha tuna.

Sinulod hi Jesus ha syudad han Capernaum, nga iya gin-uulian durante han iya mga buruhaton. May katigurangan han mga Judio nga dinaop ha iya basi maghangyo. Ginsugo hira han opisyal han kasundalohan han Roma nga usa nga Hentil, o diri Judio an lahi.

An hinigugma nga surugoon han opisyal tikamatay na tungod han grabe nga sakit, ngan karuyag niya nga ipatambal kan Jesus. Nakimalooy gud an mga Judio para ha opisyal: “Takos hiya nga buligan mo, kay hinigugma niya an aton nasud ngan hiya an nagtindog han sinagoga dinhi.”

Inupod dayon hi Jesus ha kalalakin-an. Pero han hirani na hira, an opisyal nagsugo hin kasangkayan basi magsiring: “Ginoo, ayaw na la pagpadayon, kay diri ako takos nga pakadtoon ka ha akon balay. Tungod hito waray ako dumaop ha imo.”

Iginpakita gud hito an pagkamapainubsanon han opisyal nga hiara magsugo ha iba! Pero posible nga ginhunahuna liwat niya hi Jesus, kay kustomre han mga Judio nga diri makig-upod ha mga Hentil. Nagsiring pa ngani hi Pedro: “Maaram gud kamo nga an Judio diri puydi makig-upod o kumadto ha tawo nga iba an lahi.”

Posible nga diri karuyag han opisyal nga magkaproblema hi Jesus tungod ha pagtalapas hini nga kustomre, salit ginsugo niya an iya kasangkayan nga maghangyo kan Jesus: “Pagsiring la nga mag-oopay hiya, ngan matatambal na an akon surugoon. Kay ako liwat, bisan kon may ginpapasakopan nga awtoridad, may sakop ako nga mga sundalo. Kon nasiring ako ha usa, ‘Kadto!’ napakadto hiya, ngan ha usa pa, ‘Kadi!’ nadaop hiya, ngan kon nasiring ako ha akon surugoon, ‘Buhata ini!’ iya ito ginbubuhat.”

Nahipausa gud hi Jesus hito nga iya hinbatian. Nagsiring hiya: “Susumatan ko kamo: Bisan ha Israel waray pa gud ako makakita hin sugad hini kadaku nga pagtoo.” Katapos niya tambalon an surugoon han opisyal, ginsalingabot niya an higayon basi isumat kon paonan-o an may pagtoo nga mga Hentil makarawat hin bendisyon nga ginbalewaray han waray pagtoo nga mga Judio.

Nagsiring hi Jesus: “Damu tikang ha este ngan weste an makanhi ngan malingkod ha lamesa upod nira Abraham, Isaac, ngan Jacob ha Ginhadian han langit. Pero an mga anak han ginhadian ilalabog ngadto ha kasisidman ha gawas. Didto hira mananangis ngan mangingigot an ira mga ngipon.”

“An mga anak han ginhadian [nga] ilalabog ngadto ha kasisidman ha gawas” amo an literal nga mga Judio nga waray kumarawat han oportunidad nga siyahan nga igintanyag ha ira nga magin magmarando kaupod han Kristo. Hira Abraham, Isaac, ngan Jacob nagrirepresentar han kahikayan ha Ginhadian han Dios. Salit, iginsaysay ni Jesus nga an mga Hentil kakarawaton ha langit basi lumingkod ha may lamesa, siring pa, “ha Ginhadian han langit.” Lucas 7:1-10; Mateo 8:5-13; Buhat 10:28.

▪ Kay ano nga an mga Judio nakimalooy para ha Hentil nga opisyal han kasundalohan?

▪ Ano an posible nga hinungdan nga hi Jesus waray pakadtoa han opisyal ha iya balay?

▪ Ano an karuyag sidngon han konklusyon ni Jesus?