Kapitulo 55

Damu an Waray na Sumunod

HI Jesus nagtututdo ha sinagoga ha Capernaum mahitungod han iya papel sugad nga totoo nga tinapay tikang ha langit. Sumpay ini han iya iginsaysay ha mga tawo han ira nabilngan hiya han binalik hira tikang ha este nga dapit han Dagat han Galilea, diin milagroso nga nagpakaon hiya hin tinapay ngan isda.

Nagsiring hiya: “An tinapay nga akon ihahatag amo an akon unod para ha kinabuhi han katawohan ha kalibotan.” Duha ka tuig pa la an naglabay, han katsaringsing han 30 C.E., ginsumatan niya hi Nicodemo nga hinigugma gud han Dios an kalibotan salit iginhatag niya an iya Anak sugad nga Paratalwas. Iginpapasabot ni Jesus nga an bisan hin-o ha kalibotan nga simboliko nga makaon han iya unod, pinaagi ha pagpakita hin pagtoo ha halad nga hirani na niya ihatag, mahimo magkaada kinabuhi nga waray kataposan.

Kondi an mga tawo nahipakdol ha ginyakan ni Jesus. “Paonan-o ipapakaon ha aton hini nga tawo an iya unod?” nagpakiana hira. Karuyag ni Jesus nga masabtan han mga namamati ha iya nga simboliko an pagkaon han iya unod. Salit basi pabug-atan ini, may ginhisgotan pa hiya nga mas makuri karawaton kon sasabuton hin literal.

Nagsiring hiya: “Kon diri kamo kumaon han unod ngan uminom han dugo han Anak han tawo, diri kamo magkakaada kinabuhi. An nakaon han akon unod ngan nainom han akon dugo may kinabuhi nga waray kataposan, ngan babanhawon ko hiya ha kataposan nga adlaw; kay an akon unod amo an totoo nga pagkaon, ngan an akon dugo amo an totoo nga irimnon. An nakaon han akon unod ngan nainom han akon dugo kahiusa ko pirme, ngan ako kahiusa niya.”

An igintutdo ni Jesus makangingirhat gud kon kanibalismo an iya iginpapasabot. Pero syempre, diri niya igin-aaghat nga literal nga kumaon hin unod ngan uminom hin dugo. Ginpapabug-atan la niya nga an ngatanan nga makarawat han kinabuhi nga waray kataposan kinahanglan magpakita hin pagtoo ha iya ihahalad nga perpekto nga tawhanon nga lawas ngan ha iya dugo nga igpapaagay. Pero damu han iya mga disipulo an waray ngani mangalimbasog nga sabton an iya igintutdo, ngan nagreklamo hira: “Makangingirhat ini nga mga pulong. Hin-o an makakailob pagpinamati hini?”

Maaram hi Jesus nga damu han iya disipulo an nagreklamo, salit nagsiring hiya: “Nawawara ba an iyo pagtoo tungod hini? Labi na gud kon makita niyo an Anak han tawo nga nasaka ngadto ha iya gintikangan! . . . An akon ginsiring ha iyo tikang ha baraan nga espiritu ngan naghahatag hin kinabuhi. Pero an iba ha iyo diri natoo.”

Nagsiring pa hi Jesus: “Ini an hinungdan kon kay ano nga nagsiring ako ha iyo, Waray makakakanhi ha akon gawas la kon itugot ito han Amay.” Tungod hini damu han iya mga disipulo an binaya ngan waray na sumunod ha iya. Salit ginpakianhan ni Jesus an 12 nga apostol: “Karuyag ba liwat niyo bumaya?”

Binaton hi Pedro: “Ginoo, hin-o pa man an amon kakadtoan? Ikaw an may mga pulong han kinabuhi nga waray kataposan. Natoo kami ngan maaram nga ikaw an Usa nga Baraan tikang ha Dios.” Makalilipay gud ito nga kapahayagan hin pagkamaunungon, bisan kon diri pa nasasabtan hin bug-os ni Pedro ngan han iba nga apostol ini nga igintutdo ni Jesus!

Bisan kon nalipay hi Jesus ha baton ni Pedro, nagsiring hiya: “Kamo nga 12 an akon ginpili, diri ba? Pero an usa ha iyo parapakaraot.” Hi Judas Iscariote an iya gin-uunabi. Posible nga naobserbaran niya nga hi Judas ‘nagtitikang’ na han sayop nga buhat.

Napasubo ni Jesus an mga tawo han naglikay hiya ha ira plano nga himoon hiya nga hadi. Bangin nangatadongan hira, ‘Paonan-o nga hiya an Mesias kon diri niya kakarawaton an katungdanan han Mesias?’ Posible nga ini liwat an ginhuhunahuna han mga tawo. Juan 6:51-71; 3:16.

▪ Kan kanay ihahatag ni Jesus an iya unod, ngan paonan-o nira ‘kakaunon an iya unod’?

▪ Ano pa an ginhisgotan ni Jesus nga makangingirhat para ha mga tawo, pero ano an iya ginpapabug-atan?

▪ Han damu an waray na sumunod kan Jesus, ano an reaksyon ni Pedro?