Kapitulo 23

Damu pa nga Milagro ha Capernaum

HAN Sabbath, katapos imbitaron ni Jesus an iya upat nga siyahan nga disipulo—hira Pedro, Andres, Santiago, ngan Juan—kinadto hira ha sinagoga ha Capernaum. Nagtutdo didto hi Jesus, ngan nahipausa gud an mga tawo kay nagtututdo hiya sugad hin usa nga may awtoridad, ngan diri pariho han mga eskriba.

Hini nga Sabbath, may lalaki didto nga ginsaniban hin demonyo. Waray pag-iha ginuliat hiya: “Ano an imo tuyo ha amon, Jesus nga Nazareno? Kinanhi ka ba basi poohon kami? Maaram gud ako kon hin-o ka, ikaw an Usa nga Baraan tikang ha Dios.”

An demonyo nga nagkukontrol ha lalaki usa han mga anghel ni Satanas. Ginsaway ni Jesus ito nga demonyo: “Ayaw pag-inaringasa, ngan gawas ha iya!”

Ginpakisaykisay han demonyo an lalaki ngan ginuliat ito hin makusog. Pero waray na hiya pasakiti han ginawas ito ha iya. Nahipausa gud an ngatanan! “Ano ini?” nagpakiana hira. “May awtoridad hiya ha pagsugo bisan ha magraot nga espiritu, ngan nasugot hira ha iya.” Ini nga hitabo nahibantog ha kahigrani nga lugar.

Pagbaya ni Jesus ngan han iya mga disipulo ha sinagoga, kinadto hira ha balay ni Simon, o Pedro. Pag-abot nira, hitaas an hiranat han iya ugangan nga babaye. Naghangyo hira, ‘Alayon buligi hiya.’ Salit kinadto hi Jesus ha iya, ginkaptan an iya kamot, ngan ginbuligan hiya pagbuhát. Nag-opay dayon hiya ngan nag-andam hin pagkaon para ha ira!

Katunod han adlaw, gindara han mga tawo tikang ha kahigrani nga lugar an mga may sakit ngadto ha balay ni Pedro. Waray pag-iha an ngatanan nga tawo ha syudad nagpurundok ha purtahan! Gintambal ni Jesus an ngatanan nga may sakit, anoman ito nga klase. Ginpagawas pa ngani niya an mga demonyo ha mga ginsaniban. Samtang nagawas an mga demonyo, naguliat hira: “Ikaw an Anak han Dios.” Kondi ginsaway hira ni Jesus ngan waray hira payakna, kay maaram hira nga hiya an Kristo. Marcos 1:21-34; Lucas 4:31-41; Mateo 8:14-17.

▪ Ano an nahitabo ha sinagoga han Sabbath katapos nga gin-imbitar ni Jesus an iya upat nga disipulo?

▪ Nagpakain hi Jesus han binaya hiya ha sinagoga, ngan ano nga milagro an iya ginhimo didto?

▪ Ano an nahitabo han gab-i na?