Kapitulo 117

Duro nga Kasakit ha Hardin

KAHUMAN ni Jesus mag-ampo, hiya ngan an 11 nga magtinumanon nga apostol nagkanta hin mga pagdayaw kan Jehova. Katapos linusad hira tikang ha kwarto ha igbaw, ginawas ngadto ha mahagkot nga kasisidman han kagab-ihon, ngan ginlatas an Walog han Kidron tipabalik ha Betania. Pero hinapit hira ha paborito nira nga lugar, an hardin han Getsemani ha Bukid han mga Olibo o ha hirani hito. Didto agsob magkirigta hi Jesus ngan an mga apostol ha butnga han mga kahoy nga olibo.

Iginbilin niya an walo nga apostol, bangin hirani ha tipasulod ha hardin, ngan gintugon hira: “Lingkod kamo dinhi mentras nag-aampo ako didto ha unhan.” Pero igin-upod niya an tulo, hira Pedro, Santiago, ngan Juan ngadto ha urounhan pa. Inabat gud hiya hin duro nga kasubo ngan kasakit. “Nasusubo gud an akon kalag nga haros ikamatay ko,” nagsumat hiya ha ira. “Dinhi la kamo ngan magpadayon kamo ha pagbantay kaupod ko.”

Kinadto hiya ha unhan, linuhod ngan yinukbo basi sinsero nga mag-ampo: “Amay ko, kon puydi, alayon kuhaa ini nga kopa tikang ha akon. Pero diri akon kaburut-on an susundon, kondi an imo kaburut-on.” Ano an iya karuyag sidngon? Kay ano nga ‘nasusubo gud hiya nga haros ikamatay’ niya? Naatras na ba hiya ha iya desisyon nga mamatay ngan maghatag han lukat?

Diri! Hi Jesus diri naghahangyo nga makalikay ha kamatayon. Nasina pa ngani hiya han nagsuhestyon hadto hi Pedro nga likyan an makuri nga kamatayon. Lugod, duro an iya kasakit kay nahahadlok hiya nga an paagi han iya kamatayon—sugad hin ginkakangalasan nga kriminal—makakapasipara ha ngaran han iya Amay. Inaabat niya nga pipira na la ka oras igraraysang na hiya ha kahoy sugad hin pinakamaraot nga klase hin tawo—parapasipara ha Dios! Ito an iya nababarak-an.

Katapos han maiha nga pag-inampo, binalik hi Jesus ha tulo nga apostol ngan naabtan hira nga nangangaturog. Nagsiring hiya kan Pedro: “Diri ba kamo makakagbantay upod ko hin bisan usa la ka oras? Padayon kamo nga magbantay ngan mag-ampo basi diri kamo madara han pagsulay.” Pero tungod kay nahunahuna niya an ira ginkakabarak-an ngan tungod kay hilarom na an kagab-ihon, nagsiring hiya: “Oo, an espiritu disidido pero an lawas maluya.”

Ha ikaduha nga higayon, kinadto hi Jesus ha unhan ngan nangamuyo ha Dios nga kuhaon “ini nga kopa,” karuyag sidngon, an toka o kaburut-on ni Jehova para ha iya. Han iya pagbalik, naabtan niya nga nangangaturog na liwat an tulo imbes nga nag-aampo unta basi diri madara han pagsulay. Han nagyakan hiya ha ira, diri hira maaram kon ano an ibabaton.

Ha ikatulo nga higayon, kinadto na liwat hi Jesus ha urounhan, linuhod, ngan may mga araba ngan pagtangis nga nag-ampo: “Amay ko, kon karuyag mo, alayon kuhaa ha akon ini nga kopa.” Nagsasakit gud hi Jesus ha magigin pasipara ha ngaran han iya Amay tungod han iya kamatayon nga sugad hin kriminal. Oo, makuri gud karawaton an akusasyon nga parapasipara o parapakaraot ha Dios!

Pero nagpadayon hi Jesus ha pag-ampo: “Diri uyon ha akon karuyag, kondi uyon ha imo karuyag.” Masinugtanon nga nagpasakop hiya ha kaburut-on han Dios. Hito nga takna, usa nga anghel tikang ha langit an nagpakita ngan nagparig-on ha iya. Posible nga ginsumatan hiya han anghel nga nalilipay gud ha iya an iya Amay.

Pero mabug-at gud ito nga responsabilidad ni Jesus! Nakadepende ha iya an kinabuhi nga dayon han ngatanan nga tawo ngan an iya mismo kinabuhi. Duro gud an iya inaabat nga kasakit. Salit mas naniguro hiya ha pag-inampo, ngan an iya balhas nagin sugad hin dugo nga nanunuro ha tuna. “Bisan kon talagsahon gud ini mahitabo,” siring han The Journal of the American Medical Association, “an pagbalhas hin dugo . . . mahimo mahitabo kon sobra gud nga kasakit an inaabat.”

Katapos, ha ikatulo nga pagbalik ni Jesus ha mga apostol, naabtan niya nga nangangaturog na liwat hira. Naguguol hira tungod han duro nga kasubo. “Diri yana panahon nga mangaturog ngan mamahuway kamo!” nagsiring hiya. “Pagkamata na kamo! Inabot na an oras! Kitaa! An Anak han tawo igtutubyan ha mga kamot han magpakasasala. Buhát kamo, pagkalakat kita. Kitaa! Tikanhi na an magtatraydor ha akon.”

Diri pa hiya tapos magyakan inabot na hi Judas Iscariote, upod an damu nga tawo nga may mga sulô, mga lampara, ngan mga armas. Mateo 26:30, 36-47; 16:21-23; Marcos 14:26, 32-43; Lucas 22:39-47; Juan 18:1-3; Hebreo 5:7.

▪ Han paglusad nira tikang ha kwarto ha igbaw, nagpakain hi Jesus upod an mga apostol? Ano an iya ginbuhat didto?

▪ Ano an ginbubuhat han mga apostol samtang nag-aampo hi Jesus?

▪ Kay ano nga duro an kasakit ni Jesus? Ano an iya ginhangyo ha Dios?

▪ Ano an iginpapasabot han nagin sugad hin dugo nga nanunuro an balhas ni Jesus?