Kapitulo 125

Duro nga Kasakit ha Pasakitan nga Kahoy

KAUPOD ni Jesus an duha nga kawatan nga gindara basi patayon. Diri pa hirayo ha syudad, inundang an prosesyon ha gintatawag nga Golgotha, o Lugar han Kalabera.

An mga priso ginhukasan han ira mga panapton. Katapos, may iginhatag nga bino nga ginsalaktan hin medisina nga mira. Posible nga gin-andam ito han kababayin-an ha Jerusalem, ngan igintugot han mga Romano nga ihatag ito ha mga iginraysang basi diri umabat hin kaul-ol. Pero han natilawan ito ni Jesus, waray hiya uminom. Kay ano? Matin-aw nga karuyag niya nga kontrolado niya an iya panhunahuna ngan mga sentido durante hinin pinakamakuri nga pagsari ha iya pagtoo.

Iginplastar na ha kahoy hi Jesus nga nakaunat an mga kamot ha igbaw han iya ulo. Katapos, ginpukpok han mga sundalo an dagku nga raysang ha iya mga kamot ngan mga tiil. Naliad hiya ha kaul-ol samtang nadulot an mga raysang ha iya unod ngan mga litid. Han ginpatindog an kahoy, haros diri niya mailob an kangutngot, kay nagdadaku an samad han ginraysangan tungod han bug-at han iya lawas. Pero imbes nga manarhog, nag-ampo hiya para ha Romano nga mga sundalo: “Amay, pasayloa hira kay diri hira maaram han ira ginbubuhat.”

Iginpabutang ni Pilato ha bawbaw han kahoy an karatola: “Jesus nga Nazareno, an Hadi han mga Judio.” Posible nga iginpasurat niya ini diri la tungod kay gintatahod niya hi Jesus, pero tungod kay nangangalas hiya ha Judio nga mga saserdote kay ginpirit hiya nga sentensyahan hi Jesus hin kamatayon. Basi masabtan ito han ngatanan, iginpasurat ito ni Pilato ha tulo nga linggwahe—ha Hebreo, ha opisyal nga Latin, ngan ha komon nga Griego.

Waray malipay hito an punoan nga mga saserdote pati hira Caifas ngan Anas. An ira kadaogan nadaot hiton positibo nga kapahayagan. Salit nagreklamo hira: “Ayaw surati hin ‘An Hadi han mga Judio,’ kondi an ginsiring niya nga ‘Ako an Hadi han mga Judio.’” Tungod kay nasisina hi Pilato nga gin-gamit la hiya han mga saserdote, marig-on nga nagsiring hiya: “An iginsurat ko na, diri na mababag-o.”

An mga saserdote, upod an damu nga tawo, nagkatirok ha lugar nga paratayan, ngan kinontra an mga saserdote ha nakasurat ha karatola. Gin-unabi na liwat nira an buwa nga testimonya durante han mga pagbista ha Sanhedrin. Salit gin-insulto hi Jesus han mga nalabay nga nagpipiling-piling ngan nasiring: “Ikaw nga magrurumpag han templo ngan magtitindog hito ha sulod hin tulo ka adlaw, talwasa an imo kalugaringon! Kon anak ka han Dios, lusad tikang ha pasakitan nga kahoy!”

An punoan nga mga saserdote ngan an ira mga kakunsabo ha relihiyon pauroutro nga nagsiring: “Gintalwas niya an iba, pero diri niya natatalwas an iya kalugaringon! Kon hiya an Hadi han Israel, lumusad hiya yana ha pasakitan nga kahoy ngan matoo kita ha iya. Nasarig hiya ha Dios; kon an Dios nalilipay ha iya, tatalwason hiya kay nasiring hiya nga ‘Anak ako han Dios.’”

Tungod kay naimpluwensyahan an mga sundalo, ginhimo liwat nira nga pataraw-an hi Jesus. Nakakatamay nga ira gintagan hiya hin maaslom nga bino, posible nga ginduldol la ito ha iya mamara nga mga im-im. “Kon ikaw an Hadi han mga Judio, talwasa an imo kalugaringon,” nag-insulto hira. Bisan an mga kawatan nga iginraysang ha iya sapit—ha wala ngan too—nag-insulto liwat ha iya. Hunahunaa la! An pinakabantogan nga tawo nga nabuhi, oo, an kaupod ni Jehova nga Dios ha paghimo han ngatanan nga butang, determinado nga antuson ito ngatanan nga pasakit!

Ginkuha han mga sundalo an pantungbaw nga mga panapton ni Jesus ngan gin-upat ka bahin. Nagripa hira basi hibaroan kon hin-o an magtatag-iya hito. Pero an iya pan-ilarom nga bado waray tinakipan, kay maopay gud ito nga klase hin tela. Salit nag-iristorya hira: “Ayaw naton ini paggisia, kondi pagripa kita basi hibaroan kon hin-o an magtatag-iya hini.” Tungod hito, waray hira sarabotan nga gintutuman nira an ginsiring ha kasuratan: “Ginbarahin nira an akon pantungbaw nga mga panapton, ngan ginripa nira an akon pan-ilarom nga bado.”

Usa han duha nga kawatan an nakasantop nga hadi gud hi Jesus. Salit ginsaway niya an iya kaupod: “Diri ka gud ba nahahadlok ha Dios, yana nga ginsirotan ka liwat? Husto gud ini nga sirot ha aton kay aton nakakarawat an angay gud ha aton ginbuhat. Pero ini nga tawo waray ginbuhat nga maraot.” Katapos naghangyo hiya kan Jesus: “Hinumdumi ako kon aadto ka na ha imo Ginhadian.”

Binaton hi Jesus: “Ha pagkamatuod susumatan ko ikaw yana, Makakaupod ko ikaw ha Paraiso.” Matutuman ini nga saad kon magmando na hi Jesus sugad nga Hadi ha langit, ngan kon banhawon na inin mabinasulon nga makasasala ha Paraiso nga tuna. Makakapribilehiyo ha pagkultibar hito an mga makakatalwas ha Armagedon ngan an ira mga kaupod. Mateo 27:33-44; Marcos 15:22-32; Lucas 23:27, 32-43; Juan 19:17-24.

▪ Kay ano nga waray uminom hi Jesus han bino nga ginsalaktan hin medisina nga mira?

▪ Ano an posible nga hinungdan nga ginbutangan hin karatola an kahoy nga ginraysangan kan Jesus? Tungod hito, ano nga pagbatonay an nahitabo butnga ni Pilato ngan han punoan nga mga saserdote?

▪ Ano pa nga kasakit an gin-antos ni Jesus ha pasakitan nga kahoy, ngan ano an hinungdan hito?

▪ Paonan-o natuman an tagna tungod ha ginbuhat ha mga panapton ni Jesus?

▪ Ano nga pagbag-o an ginhimo han usa nga kawatan? Paonan-o tutumanon ni Jesus an iya hangyo?