Kapitulo 83

Gin-abiabi han Pariseo

HI Jesus aadto pa ha balay han prominente nga Pariseo ngan gintambal pa la an lalaki nga nanhuhupong. Han naobserbaran niya nga ginpipili han iya mga igkasi-bisita an pinakamaopay nga mga pwesto ha pangaon, nagtutdo hiya hin leksyon ha pagpaubos.

“Kon may mag-imbitar ha imo ha panagtawo ha kasal,” siring ni Jesus, “ayaw lingkod ha pinakamaopay nga pwesto. Bangin may gin-imbitar liwat hiya nga mas kilala kay ha imo, ngan dumaop hiya ha imo ngan magsiring, ‘Ihatag hini nga tawo ini nga pwesto.’ Salit naaawod nga mabalhin ka ha pinakaubos nga pwesto.”

Nagsagdon pa hiya: “Kon imbitaron ka, pakadto ngan lingkod ha pinakaubos nga pwesto, basi pagdaop han nag-imbitar ha imo, masiring hiya, ‘Sangkay, balhin ha maopay nga pwesto.’ Ngan mapapasidunggan ka ha atubangan han ngatanan nga imo igkasi-bisita.” Sugad nga konklusyon, nagsiring hiya: “An bisan hin-o nga nagpapahitaas pauubson, ngan an bisan hin-o nga nagpapaubos pahihitas-on.”

Katapos, iginsaysay ni Jesus ha Pariseo nga nag-imbitar ha iya kon ano nga pagpakaon an inuuyonan han Dios. “Kon mag-andam ka hin paniudto o panihapon, ayaw imbitara an imo kasangkayan, kabugtoan, mga paryente, o riko nga mga amyaw. Bangin imbitaron ka liwat nira ngan magin bayad ito ha imo. Lugod, kon mag-andam ka hin panagtawo, imbitara an mga pobre, baldado, piay, ngan buta, ngan malilipay ka, kay waray hira maibabalos ha imo.”

An pagpakaon ha mga nagkukuri makakalipay ha nag-andam hito, kay sugad han ginsiring ni Jesus ha nag-imbitar ha iya, “Babalosan ka ha pagkabanhaw han mga matadong.” Tungod han iya pagsaysay hinin inuyonan nga pagpakaon, nahinumdom an iya igkasi-bisita hin lain nga pangaon, ngan nagsiring: “Malipayon an nakaon hin tinapay ha Ginhadian han Dios.” Pero diri ngatanan naapresyar hiton makalilipay nga paglaom, sugad han iginpapakita ha iya sunod nga ilustrasyon.

“Usa nga tawo an nag-andam hin daku nga panihapon, ngan damu an iya gin-imbitar. . . . Ginsugo niya an iya uripon nga sidngan an mga gin-imbitar, ‘Kadi na kamo, kay andam na an panihapon.’ Pero namaribad hira ngatanan. An siyahan nagsiring, ‘Nakapalit ako hin uma ngan kinahanglan kadtoon ko ito basi kitaon. Pasensya na, diri ako puydi.’ Ngan an usa nagsiring, ‘Nakapalit ako hin lima ka padis nga baka ngan kakadtoon ko ito basi usisahon. Pasensya na, diri ako puydi.’ An usa pa nagsiring, ‘Bag-o la ako nga kasal, salit diri ako puydi kumadto.’”

Maluya gud ito nga mga rason! Antes pumalit hin uma o mga hayop, gin-uusisa anay ito, salit diri kinahanglan nga kitaon dayon ito katapos paliton. Sugad man, an pagin inasaw-an diri sadang makaulang ha pagkarawat hiton importante nga imbitasyon. Salit pakabati han agaron hito nga mga rason, nasina hiya ngan nagsugo ha iya uripon:

“‘Kadto dayon ha haluag nga mga dalan ngan ha kakalsadahan han syudad, ngan dad-a nganhi an mga pobre, baldado, buta, ngan piay.’ Pagbalik han uripon nagsiring hiya, ‘Agaron, gintuman ko na an imo sugo, pero may bakante pa.’ Ngan an agaron nagsiring ha uripon, ‘Kadto ha mga dalan ngan ha inalad nga mga lugar, ngan pirita hira pagkanhi, basi mapuno an akon balay. . . . Bisan usa hito nga mga gin-imbitar diri makakatilaw han akon gin-andam nga panihapon.’”

Ano an kahulogan hito nga ilustrasyon? “An agaron” nga nag-andam hin panihapon nagrirepresentar kan Jehova nga Dios; “an uripon” nga ginsugo ha pangimbitar amo hi Jesu-Kristo; ngan an “daku nga panihapon” amo an mga oportunidad nga magin bahin han Ginhadian ha langit.

An siyahan nga gin-imbitar nga magin bahin han Ginhadian amo an Judio nga mga lider han relihiyon ha panahon ni Jesus. Pero ginbalewaray nira ito. Salit tikang han Pentekostes 33 C.E., an ikaduha nga gin-imbitar amo an mga tinamay ngan mga ubos ha Judio nga nasud. Pero diri pa igo an kadamu han nagkarawat basi makompleto an 144,000 nga pwesto ha Ginhadian han Dios ha langit. Salit han 36 C.E., paglabay hin tulo ngan tunga ka tuig, an ikatulo ngan ultimo nga gin-imbitar amo an diri-turi nga mga diri Judio, ngan an pagtirok ha ira nagpapadayon tubtob yana. Lucas 14:1-24.

▪ Ano nga leksyon mahitungod ha pagpaubos an igintutdo ni Jesus?

▪ Ano nga pagpakaon an inuuyonan han Dios, ngan kay ano nga makakalipay ito ha nag-imbitar?

▪ Kay ano nga maluya gud an mga rason han mga gin-imbitar?

▪ Ha ano nagrirepresentar an “daku nga panihapon” ha ilustrasyon ni Jesus?