Kapitulo 11

Gin-andam ni Juan an Dalan

DISISYETE ka tuig na an naglabay tikang han nagpinakiana hi Jesus ha mga magturutdo ha templo han 12 anyos hiya. Yana katsaringsing na han 29 C.E., ngan baga hin an ngatanan nag-iiristorya mahitungod ha patod ni Jesus nga hi Juan nga nagsasangyaw ha ngatanan nga lugar ha palibot han Salog Jordan.

Hi Juan gwapo ngan maopay gud magyakan. Barahibo han kamel an iya bado ngan anit an iya paha. An iya pagkaon duron ngan dugos ha kagurangan. Ngan ano an iya mensahe? “Pagbasol kamo, kay an Ginhadian han langit hirani na.”

Ini nga mensahe nakalipay ha mga namamati ha iya. Damu an nakasantop nga kinahanglan hira magbasol, karuyag sidngon, bag-uhon an ira paggawi ngan bayaan an ira diri maopay nga pagkinabuhi. Salit kinadto kan Juan an damu nga tawo tikang ha ngatanan nga lugar ha palibot han Jordan, ngan bisan tikang ha Jerusalem, ngan iya ginbawtismohan hira pinaagi ha pagpailarom ha ira ha tubig han Jordan. Kay ano?

Ginbawtismohan hira ni Juan sugad nga simbolo, o pagkilala, han ira kinasingkasing nga pagbasol han mga sala kontra ha ginkasabotan nga Balaud han Dios. Salit han kinadto kan Juan ha Jordan an pipira nga Pariseo ngan Saduseo, iya ginkondenar hira. “Kamo nga katulinan han mga halas,” nagsiring hiya. “Ipakita ha buhat nga nagbabasol kamo. Ayaw kamo pagsiring ha iyo kalugaringon, ‘Hi Abraham an amon amay.’ Susumatan ko kamo, makakahimo an Dios hin mga anak para kan Abraham tikang hini nga mga bato. An atsa andam na pag-utod han gamot han mga kahoy. Salit an tagsa nga kahoy nga diri nagbubunga hin maopay, uutdon ngan ilalabog ha kalayo.”

Tungod kay nagin popular hi Juan, an mga Judio nagsugo hin mga saserdote ngan mga Lebihanon ngadto ha iya. Nagpakiana hira: “Hin-o ka?”

“Diri ako an Kristo,” binaton hi Juan.

Nagpakiana utro hira: “Kon sugad, hin-o ka? Hi Elias ka ba?”

Binaton hiya: “Diri.”

“Ikaw ba An Propeta?”

“Diri!”

Salit nagpakiana na liwat hira: “Hin-o ka? Sumati kami basi isumat namon ha nagsugo ha amon. Ano an masisiring mo mahitungod han imo kalugaringon?”

Hi Juan nagsaysay: “Ako an nagsisinggit ha kamingawan, ‘Hawani niyo an dalan ni Jehova,’ sugad la han ginsiring ni propeta Isaias.”

“Kay ano man nga nagbabawtismo ka kon diri ikaw an Kristo o hi Elias o An Propeta?” karuyag nira mahibaro.

Binaton hi Juan: “Nagbabawtismo ako ha tubig. Ha butnga niyo natindog an usa nga diri niyo kilala, an usa nga makanhi sunod ha akon.”

Gin-aandam ni Juan an dalan pinaagi ha pagbulig ha mga tawo nga kinasingkasing nga karawaton an Mesias nga magigin Hadi. Mahitungod ha Iya, hi Juan nagsiring: “Hiya nga makanhi mas may awtoridad kay ha akon, ngan diri ako takos maghukas han iya sandalyas.” Ha pagkamatuod, nagsiring pa ngani hi Juan: “Hiya nga makanhi sunod ha akon nahiuna ha akon, kay nahiuna hiya pag-eksister ha akon.”

Salit an mensahe ni Juan nga “an Ginhadian han langit hirani na,” nagpapasabot ha publiko nga hirani na magtikang an ministeryo ni Jesu-Kristo, an ginpili nga Hadi ni Jehova. Juan 1:6-8, 15-28; Mateo 3:1-12; Lucas 3:1-18; Buhat 19:4.

▪ Ano nga klase hin tawo hi Juan?

▪ Kay ano nga nanbabawtismo hi Juan?

▪ Kay ano nga nagsiring hi Juan nga an Ginhadian hirani na?