Kapitulo 22

Gin-imbitar an Upat nga Disipulo

KATAPOS nga gin-ikaparatay hi Jesus ha iya mismo bungto ha Nazaret, kinadto hiya ha syudad han Capernaum hirani ha Dagat han Galilea. Tungod hito natuman an usa pa nga tagna ni Isaias, nga an mga tawo ha Galilea nga naukoy hirani ha dagat makakakita hin duro nga lamrag.

Samtang gindadara didto ni Jesus an lamrag pinaagi ha pagsangyaw han Ginhadian, ginbiling niya an upat han iya mga disipulo. Kaupod-upod niya hira hadto pero binalik hira ha negosyo nga pangisda han inuli hira kaupod ni Jesus tikang ha Judea. Posible nga ginbibiling hira ni Jesus kay kinahanglan nga may masasarigan ngan permanente hiya nga mga kabulig nga mababansay niya ha pagpadayon han ministeryo kon waray na hiya.

Salit han naglalakat hi Jesus ha baybayon ngan nakita hi Simon Pedro ngan an iya mga kaupod nga naglilimpyo han ira mga pukot, dinaop hiya ha ira. Sinakay hiya ha baluto ni Pedro ngan naghangyo nga ighurohirayo ito ha baybayon. Katapos liningkod hi Jesus ha baluto ngan nagtutdo ha mga tawo ha baybayon.

Kahuman, ginsidngan niya hi Pedro: “Dad-a ha hilarom an baluto, ngan ihulog an iyo mga pukot basi makadakop.”

“Magturutdo,” siring ni Pedro, “ha bug-os nga gab-i nangalimbasog kami kondi waray kami nadakop, pero tungod han imo ginsiring, ihuhulog ko an mga pukot.”

Han iginhulog nira an pukot, nakadakop hira hin damu gud nga isda. Nagisi pa ngani an ira mga pukot. Salit nagsinyas dayon hira ha ira mga kaupod ha iba nga baluto nga kumadto ha ira basi buligan hira. Napuno nira hin isda an duha nga baluto salit nagtikalunod ito. Pakakita hito ni Pedro, linuhod hiya ha atubangan ni Jesus ngan nagsiring: “Ginoo, diri ako takos humirani ha imo, kay makasasala ako nga tawo.”

“Ayaw na kahadlok,” siring ni Jesus. “Tikang yana mangingisda ka hin buhi nga mga tawo.”

Gin-imbitar ni Jesus pati an bugto ni Pedro nga hi Andres, ngan gin-aghat hira: “Sunod kamo ha akon, ngan hihimoon ko kamo nga parapangisda hin mga tawo.” Gin-imbitar liwat an ira kasosyo ha pangisda nga hira Santiago ngan Juan nga mga anak ni Sebedeo, ngan inupod dayon hira ha iya. Salit ginbayaan hini nga upat an ira negosyo ha pangisda ngan hira an nagin siyahan nga masasarigan ngan permanente nga sumurunod ni Jesus. Lucas 5:1-11; Mateo 4:13-22; Marcos 1:16-20; Isaias 9:1, 2.

▪ Kay ano nga gin-imbitar ni Jesus an iya mga disipulo nga sumunod ha iya, ngan hin-o hira?

▪ Ano nga milagro an nahadlokan ni Pedro?

▪ Ano nga klase hin pangisda an igin-aghat ni Jesus ha iya mga disipulo?