Kapitulo 91

Ginbanhaw hi Lasaro

HI Jesus ngan an iya mga kaupod inabot na ha ginlubngan kan Lasaro. Lungib ito nga an ganggang ginsadhan hin bato. Nagsiring hi Jesus: “Kuhaa niyo an bato.”

Diniri hi Marta kay diri hiya maaram kon ano an bubuhaton ni Jesus. Nagsiring hiya: “Ginoo, mabaho na gud hiya kay ikaupat ka adlaw na yana.”

Kondi nagpakiana hi Jesus: “Diri ba ginsidngan ko ikaw nga kon tumoo ka makikita mo an himaya han Dios?”

Salit ginkuha an bato. Katapos, hinangad hi Jesus ngan nag-ampo: “Amay, nagpapasalamat ako ha imo nga ginpapamatian mo ako. Maaram ako nga ginpapamatian mo ako pirme; pero nagyayakan ako tungod han mga tawo nga aanhi, basi tumoo hira nga ginsugo mo ako.” Nag-ampo hiya ha atubangan han mga tawo basi mahibaroan nira nga an iya pagbubuhaton mahitatabo pinaagi ha gahum nga iginhatag ha iya han Dios. Katapos, ginuliat hiya: “Lasaro, gawas ngadi!”

Dida hito, ginawas hi Lasaro. Nakasangbod pa ha iya mga kamot ngan mga tiil an bendahe nga panlubong, ngan putos pa hin tela an iya nawong. Nagsiring hi Jesus: “Badbari hiya ngan palakta.”

Damu han mga Judio nga kinadto basi liawon hira Maria ngan Marta an tinoo kan Jesus han pakakita nira han milagro. Pero an iba kinadto ha mga Pariseo basi isumat an nahitabo. Nagpatawag dayon hira ngan an punoan nga mga saserdote hin miting han Sanhedrin, an korte suprema han mga Judio.

An Sanhedrin ginkukompwesto han hitaas nga saserdote nga hi Caifas, sugad man han mga Pariseo ngan mga Saduseo, punoan nga mga saserdote, ngan mga hitaas nga saserdote hadto. Nabaraka hira: “Ano an aton bubuhaton, kay ini nga tawo nagbubuhat hin damu nga milagro? Kon pabay-an la naton hiya, hira ngatanan matoo ha iya, ngan makanhi an mga Romano ngan aagawon an aton lugar pati an aton nasud.”

Bisan kon ginkikilala han mga lider han relihiyon nga “nagbubuhat hin damu nga milagro” hi Jesus, interesado la hira ha ira katungdanan ngan awtoridad. An kabanhaw ni Lasaro daku gud nga kaarawdan ha mga Saduseo, kay diri hira natoo ha pagkabanhaw.

Hi Caifas, nga posible usa nga Saduseo, nagsiring: “Waray gud kamo hinbabaroan, ngan diri kamo nakakasabot nga para ha iyo kaopayan nga mamatay an usa nga tawo para ha katawohan imbes nga mabungkag an bug-os nga nasud.”

Hi Caifas ginpagios han Dios nga magsiring hito, kay ha urhi hi apostol Juan nagsurat: “Ini nga [kan Caifas] ginsiring diri iya kalugaringon nga mga ideya.” Iginpapasabot ni Caifas nga kinahanglan patayon hi Jesus kay tungod ha Iya nagtitikawara an ira katungdanan ngan impluwensya. Pero sumala kan Juan, ‘nagtagna hi Caifas nga hi Jesus itinanda nga mamatay diri la para ha nasud, kondi basi liwat matirok an mga anak han Dios.’ Oo, katuyoan han Dios nga mamatay an iya Anak sugad nga lukat para ha ngatanan.

Naimpluwensyahan gud ni Caifas an Sanhedrin basi magplano ha pagpatay kan Jesus. Pero posible nga nahibaro hito hi Jesus tikang kan Nicodemo, nga usa nga membro han Sanhedrin nga makisangkayon ha iya. Salit binaya hiya didto. Juan 11:38-54.

▪ Kay ano nga nag-ampo hi Jesus ha atubangan han mga tawo antes ginbanhaw hi Lasaro?

▪ Ano an reaksyon han mga nakakita hito nga pagbanhaw?

▪ Paonan-o naibuhayhag an karaotan han mga membro han Sanhedrin?

▪ Ano an motibo ni Caifas, pero ano an igintagna han Dios pinaagi ha iya?